Avûkatê ewropayijî wazenê şorê Îmrali û tecrîdê vera Rayberê Şarê Kurdî Abdullah Ocalanî bişiknê.

Avûkatan 14ê êlule de paytextê Belçîka Bruksel de kombîyayîşêkê çapemenîye kerd û dîyar kerd ke ê wazenê şorê Îmraliyî. Nameyê 350 avûkatan ser o eşkerayîye amebî dayene û amebî waştene ke tecrîdê vera Rayberê Şarê Kurdî Abdullah Ocalanî biqedo û heqê ci yê pawitişî bêro caardene.

Kombîyayîşî ra dima Endama Baroyê Brukselî û Torra Avûkatanê Averwazan Selma Benkhelîfa qisey kerd û dîyar kerd ke Komela Huqûqnasan a Ewropa ya Seba Demokrasî û Heqanê Merdiman seba şîyayîşê Îmraliyî serkêşîya xîretan kena.

Benkhelifa da zanayene ke 350 avûkatî tede ê wazenê şorê Îmraliyî. Benkhelifa pare kerd ke înan Wezîrîya Edaletî ya Tirkîya û komeleyanê avûkatan ê dinya rê mektube nuşte û vat: “Şiknayîşê tecrîdî girîng o. No tecrîd nêbeno ke dewam bikero. Bi waştişê şîyayîşê Îmraliyî ma wazenê nê tecrîdî bişiknê. Asta bîne zî no yo ke ma do şorê Îmraliyî.”

Sereka Sendîkaya Avûkatan a Seba Demokrasî (SAD) Helene Debaty ard ziwan ke seba teqîbkerdişê Zîndanê Îmraliyî û dewayanê bînan înan Tirkîya zîyaret kerda. Debatye îfade kerd ke înan tewr peyên dewaya avûkatanê ÇHDyî teqîb kerda û vat: “Tirkîya dewayan de krîterê muhakemekerdişê edilî û bêterefî bi temamî binpay kena. Ma babeta Îmraliyî de xo sey mesuldaran vînenê. Heqê pêro avûkatan est o ke bieşkê muwekîlanê xo bivînê. Eke têkilîya avûkatan bi Ocalanî û tepişteyanê bînan çin biba nêeşkenê amadekarîya dewa bikerê. Tecrîd heqê pawitişî binpay keno. No hem seba ma hem zî seba pêro avûkatan zaf girîng o.”