Avûkatanê Buroyê Huqûqî yê Asrinî ra Rezan Sarica, Razîye Ozturk, Faîk Ozgur Erol û Emran Emekçî semedê muwekîlê xo Rayberê Şarê Kurdî Abdullah Ocalanî muracatê Serdozgerîya Komare ya Bursa û Mudirîya Zîndanê Îmraliyî kerd.
Xeylêk wexto ke Rayberê Şarê Kurdî Abullah Ocalanî ra xebere nêna girewtene. Avûkatî hewte de rey semedê pêvînayîşî muracat kenê la muracatê înan bi hewayêkê sîstematîkî bêcewab yenê verdayene. Ge-ge yeno eşnawitene ke cezaya dîsîplînî ameya dayene.
CPT 3ê teşrîna verêne de eşkera kerdbî ke înan Îmrali zîyaret kerdo la Buroyê Huqûqî yê Asrinî 29ê teşrîna peyêne de eşkera kerd ke CPTyî Rayberê Şarê Kurdî Abdullah Ocalanî reyde pêvînayîş nêkerdo. Nê zî qisawetî zêdînayî.
