Hemsereka HDPyî ya Amedî Gulîstan Atasoye vat ke binkewtişê îqtîdarî destê HDPyî de yo û nê semedî ra îqtîdar înan krîmînalîze keno.

Blokê AKP-MHPyî yo faşîst seba krîmînalîzekerdişê HDPyî teda keno. Rixmê astengî û tedaya îqtîdarî zî HDP şarî reyde karanê xo rê bêmabên dewam keno.

Hemsereka HDPyî ya Amedî Gulîstan Atasoye derheqê teda û ablûqaya vera înan de ANFyî rê qisey kerd. Atasoye îfade kerd ke vera sîyasetê kurdan cîyakerîye yena kerdene û bi taybetî 2016 ra dima rejîm vera partîya înan hêrişanê giranan keno.

Atasoye da zanayene ke kerdişê vera HDPyî qanûnî nîyê û vat: “Xîret yeno kerdene ke heqê sîyasetî ma ra bêro girewtene. Îqtîdar ney zî bi neteweperwerî û şovenîzmî keno. Ê dişmenîya kurdan kenê. Binkewtişê îqtîdarî destê HDPyî de yo coka îqtîdar tim HDPyî keno hedef û krîmînalîze keno.”

Atasoye bale ante ser ke Amed tim bîyo merkezêko sîyasî yê Kurdistan û Tirkîya û vat: “Coka vera Amedî pêro mekanîzmayê teda şuxilîyenê. Her eşkerayîya ma de bi hezaran polîsî ablûqa nanê ro. Bi nê hawayî kenê ke komelî bitersnê. La şarê Amedî, şarê kurdî, sîyasetê kurdan vera ney refleksêkê xurtî mojnenê û tim cewab danê ney. Nika ra pey zî bêguman ma do sînoranê ke faşîzmê îqtîdarî nayê ma verî qetî qebul mekerê. Ma do tim waştişanê xo yê meşrûyan bîyarê ziwan.”