Şer û aştî du têgehên li dijî hev in. Aştî û şer bi hevre pêş nakevin. Ji bo aştiyeke bi rumet li ser axa Kurdistan, Tirkiye, Rojhilata Navîn û cîhanê belav bibe, divê berî her tiştî şer raweste. Çiqas şer hebe, ew qas zordestî, tundî, binpekirina mafan jî heye. Niha li Tirkiyeyê her kes pêvajoya aştiyê niqaş dike. Her kes bi hevî ye ku aştî pêş bikeve. Lê ji bo aştî pêş bikeve jî divê kesên şer pêş dixin bêne rawestandin. Bêguman kesên di şer de israr dikin bi awayekî dildarî dest ji şer bernadin. Divê kesên aştiyê dixwazin, zorê li şerxwazan bikin û karibin rê li pêşiya şerê wan bigirin.
Rêberê Gelê Kurd Abdullah Ocalan ji 1993an heta niha bi awayekî fermî dixwaze pirsgirêka kurd û Tirkiyeyê bi rêya aştî û demokrasiyê bê çareserkirin. Her tim ji bo aştî pêş bikeve agirbest îlan kir, lê her dem artêşa tirk agirbest xera kir. Vê carê Rêberê Gelê Kurd bi biryarên radîkal hemû hincetên ku Tirkiye pê şer bike, ji destê dewletê girt. Ji bo aştî û çareserî pêş bikeve berpirsiyarî da ser milê hemû partî û rêxistinên sivîl û demokratîk. Lê Li gel hewldanên Abdullah Ocalan dîsa nûnerên dewletê waliyên bajaran û qeymeqamên navçeyan biryarên ku rê li pêşiya çareseriyê digirin davêjin. Dema em li pratîkên dewletê yên li jêr binerin rastî şênbertir dibe.
12 Adar: Walîtiya Şirnexê çiyayên Cûdî, Gabar û Kurt û herêma Besta, Kelamemê, Donmezler, Kovankaya, Textereş, Încebeldaglari, Oymakaya û Altindaglari ku talankirina xwezayê û petrolê lê berdewam dike, weke “herêma ewlekariya taybet a demkî” îlan kir û ketin û derketina van herêman heta 15 rojan qedexe kir. Walîtiyê ragihand ku qedexeya li van herêman dê ji 13’ê Adarê dest pê bike û heta 27’ê Adarê bidome.
25 Sibat: Wezareta Çand û Turîzmê bi hinceta “Guncav nehatiye dîtin” pêşandana filmê “Em hatin lîstikê” ku Kazim Oz derhêneriya wê dike, qedexe kir.
21 sibat Piştî 6 sal û 3 meh cezayê hefsê li Hevşaredarê Qaxizmanê Mehmet Alkan hatî birîn, têketina navçeyê hate qedexekirin. Hevşaredaran jî pankarta “Em bi hilbijartinê hatin bi qeyûm naçin” li avahiya şaredariyê daliqandin.
20 sibat: Polîsan li Lice ya Amedê bi hinceta ku qehwexaneyekê kanala Medya Haber TV vekiriye, ji bo mehekê mohr kirin.
13 Sibat: Walîtiya Dîlokê çalakiyên karkeran ên şevê qedexe kir. Walîtîya Dîlokê çalakî li karkerên ku li Herêma Pîşesaziya Organîze (OSB) ya Başpinarê ya Dîlokê dixebitin çalakiyên şevê qedexe kir. Piştî walîtiyê çalakî qedexe kir, polîs hatin cihê çalakiyê û darê zarokê çadirên karkeran hilweşandin û birin.
11 Sibat: Walîtiya Bedlisê hemû çalakî û şahiyên li nava bajarê Bedlisê ji bo 6 rojan qedexe kir. Walîtiyê di heman dîrokê de ketin û derketina bajêr û navçeyan jî qedexe kir.
11 Sibat: Walîtiya Şirnexê careke din 11 herêm weke “herêma ewlehiya taybet a demkî” ragihand. Walîtiyê di daxuyaniya xwe de diyar kir ku têketina 11 herêmên li navenda Şirnexê û navçeyên wê yên Cizîr, Silopiya, Basa, Qileban û Elkê ji bo 15 rojan hatine qedexekirin. Qedexe dê di navbera 26’ê Sibatê û 15’ê Sibatê de be.
