Dewleta Tirkîya şer de israr bikero, qaosî ra vêşêr, hesrê çiman ra vêşêr û xizanîye ra vêşêr yewna çîy nêana. Nê pancas serrî yo ke, xo ra şer beno û netîce orte de ya. Rayîrê aqilî yew o, no rayîr zî rayîrê aşîtî û pêâmeyîşî yo.

Semedo ke meseleya kurdan çareser bibo, terafî goreyê xo pozîsyon gênê û goreyê nê pozîsyonî sozê xo vanê. Tewr verî Dewlet Bahçelî vat ke, “Wa Ocalan bêro Meclîs de kombîyayîşê DEMî de semedo ke fek çekan ra verrado venga PKKyî bido, wa fek çeke ra verradê. Ocalan zî wa Heqê Hêvîye ra îstîfade bikero.”  Nê vatişî dima 23yê teşrîna verêne de, warzayê Ocalanî Omer Ocalan şî Îmrali de Ocalan zîyaret kerd. Ocalanî no pêvînayîş de mesajê “Şertî musaît bibê, hêzê mi est o ke ez prosesî zemênê pêrodayîş û şîdetî ra bianca zemênê huqûq û sîyasî” dabî. Dima zî wekîlê DEMî Pervîn Bûldan û Sirri Sureyya Onder şîyê Îmrali de Ocalan zîyaret kerdo. Ocalanî no pêvînayîş de bi nê mesajî fikrê xo ardo ziwan;

*Bi hêzkerdişê birayî/biratî û seyyewbînanîya şaranê kurdan û tirkan berpirsîyarîyêka tarîxî ya. Bi qasî na berpirsîyarîya tarîxî/dîrokî, ende zî seba sibaroja heme şaran yew diyarkero muhîm o û acîlîyet wazêno.

* Seba serkewtişê prosesî, ganî heme derûdorê sîyasî yê Tirkîya, wa hesabanê xo yê wirdêkan û demkîyan yewna het de vîyardê û bibê wayîrê yew înîsîyatîfî. Ganî pozîtîf têbigêrê û piştdayîşê pozîtîfî bidê nê prosesî. Bê guman zemêno ke piştbido/peştbido, yew zî Parlamentoyê Tirkîya (TBMM) yo.

* Hedîseyê ke Gazze û Sûrîye de benê, nawnenê ke bi mudaxaleyanê teberê yê ke wazenê ke meseleyan bikerê kangren, mesele çareser nêbena. Çareserîya na mesela hinê nîyna taloqkerdiş. Bi no cîddîyet, bi xebatêka raşt û paralele, piştdayîş û pêşnîyazê muxalefetî, seba çareserî muhîm î.

* Ez zî wayîrê nê zanayîş û biryardarî ya ke, manaya pozîtîfe de piştdayîş bida paradîgmaya ke birêz Bahçelî û birêz Erdogan hêz danê. Dewr; Tirkîya de û herême de dewrê birayî yo.

* Heyet ko no nêzdîbîyayîşê mi bi dewlete û derûdorê sîyasîyan reyra pare/bare bikero. Na çarçuwa de ez amade ya ke, gamanê pozîtîfan bifîyna û vengdayîşan bikera.

* Nê heme xebatê ma, seba ke welatî ma biresnê daraxa ke heq kerda. Eynî dem de seba ke transformasyono demokratîk, ko bibo rêberêko/rayberêko bi qîymet.

*Dem seba Tirkîya û herême; demê aşîtî, demokrasî û wayî û birayî yo.

Dima zî wekîlê DEM’î Pervîn Bûldan, Ahmet Turk û Sirri Sureyya Onderî partîyê ke Meclîsê Tirkîya temsîl kenê, zîyaret kerdê.

Wekîlê DEMî Pervîn Bûldan, Ahmet Turk û Sirri Sureyya Onderî xeyrê Îyî Partî, heme partîyî zîyaret kerdê. Dima zî hepîsxane de Selahattîn Demîrtaş, Selçuk Mizrakli û Leyla Guwene zîyaret kerdê. Goreyê înan nê zîyaretî pozîtîf vêrtê. Nê pêvînayîşan ko bi kombîyayîşê çapemenî, rayaumûyî rê pare/bare bikerê.

Tayê partî, merdimî û sazîyî; aşîtî û birayî û seyyewbînaneyî nêwazenê. Wazenê ke nê prosesî sabote bikerê. Nê sîstemî se sîstemêko muqeddes û mutlaq hesibnenê. Sîstemê xo se sîstemê Homayî hesibnenê. Îdarekarê nê sîstemî zî xo se xelîfe, hetta haşa xo se temsîlkarê Homayî hesibnenê. Çi heyf ke hukmatê Tirkîya na polîtîkaya îmhayî û înkarî de israr keno. Adeta asmîna ra geyrenê, pirnika xo ra muy nêgênê.

Yew het ra dewlete behsê aştîtî kena, yewna het ra hem zereyê Tirkîya de hem Başûr de û yewna het ra Rojawan de operasyonanê xo yê leşkerîyî dewam kena. Dewleta Tirkîya û SMO Rojawan de, Bendawê Tişrînî de, dormareyê pirdê Qereqozaqî de û dormareyê Kobanê de nê çewres rojî yo ke, bi teyaranê şerî, teyaranê bêmerdiman, tanqan û topan hêrişê xo de israr kenê. Tewr peynî de teyaranê Tirkîya Bendawê Tişrinî ser o sîvîlî ke newbi tewşê/tepîşenê bombarduman kerdê, hîrê sîvîlî qetil kerdê, 19 sîvîlî zî birîndar kerdê. Verî zî hêrişanê xo de, 25 cinî û 45 gedeyî qetil kerdbî. Wezîrê Pawitişî zî vat ke; ”Operasyonê hewayî dewam keno. Vera terorî têkoşîn dewam keno.”

Xora heme wext vanê ke, “Ma Kobanê tede, heme Rojawanî gênê xo dest.” No xusus de, her roj beyanatan danê çapemenî û televîzyonan. Nê kerdeyî û no zîhnîyet aşîtî rê xizmet nêkeno. Yewna het ra qayyûm tayîn kenê, îradeyê kurdan û şaranê bînan xesp kenê. Berpirsîyarê na dewlete, behsê demokrasî û azadî kenê, la her roj tehdit kenê, ziwanê şantajî karanê. No proses de, şer de û nê ziwanê tehdîtî de israr yew gureyê aqilî nîyo.

Tewr peynî de Erdogan vat ke; “YPG ke xo fesih nêko, ma sereyê YPGyî pelçiqnenê/pelixnenê.”  Nê pancas serrî yo ke eynî çîyan vanê. Şarê Tirkîya û şarê dinya hinê şer nêwazenê. Serekê  DEM’î Tuncer Bakirhanî vat ke; “Neteweyanê Yewbîyayeyan de 204 dewletî vanê ke ‘wa kurdî heqanê xo yê demokratîkan bigîrê’, la tena Dewleta Tirkîya vana ke ‘kurdan rê heq çin o, huquq çin o, statu çin o’.” Yewna het ra Dewleta Tirkîya Trumpî ra destek pawitêne. La Wezîrê Trumpî yo newe Marco Rubîoyî zî vat ke; “Seba YPG’yî destekê ma dewam keno”. Yanî Sûrîye de polîtîkaya Yewîya Amerîka nêbedîlîna. Na zelal a ke Amerîka nêwazena Tirkîya û YPG pêrodê.

Sûrîye de tena HTŞ nişno goreyê xo yew sîstem awan bikero. Aseno ke Sûrîye de sere de Amerîka tede Îsraîl, Fransa, Almanya, Îngiltere, Rûsya, Îran û sewbîna hêzî est ê. Sûrîye de mutlaqa yew planê nê hêzan est o. Peynî de no plan cayê xo gêno nêgêno, wext nawneno.  Nê şertan de tehdîtê “Ez pelixnena, orte ra hewanena” zaf pere nêkeno. Dewleta Tirkîya edebîyatê hamasetî ra ganî fek verrado. Na polîtîkaya înkar û îmhayî, nê şertan de hinê bazar nêveynena.

Fermandarê HSDyî Mazlum Ebdî wina vat: “Sûrîye de rewşêka newe vejîyaya meydan. Ma seba çareserîye hadre yê. Ma ko Bakûr û Rojhilatê Surîye de zî mîyanê munaqeşeyê çareserîye de ca bigêrê.” Xora mîyanê HTŞ û QSDyî de yew pêvînayîş dewam keno. Tewr peynî de Heleb de HTŞyî hêrişê kurdan kerdo. No yew provoqasyon o. Sûrîye de zafrengînîye est a. Sûrîye de erebî, kurdî, turkmenî, suryanî, ermenî, çerkezî û arnawûdî est ê. Semedo ke Sûrîye de nê heme şarî, dîn û mezhebî xo azad îfade bikerê, ganî yew sîstemêko demokratîk awan bibo. Na polîtîka ra teber, hinê zorî reyde yew sîstemo otorîter Sûrîye rê huzur nêano.

Dinya bedilêna, Tirkîya zî ganî bibedilîyo. Nê statuqoyî reyra hinê Tirkîya îdare nêbena. Ganî goreyê qeydeyanê aştî, heq û huqûqê ewrenselî meseleya kurdan çareser bibo. Dewleta Tirkîya ver de di rayîrê est ê; ya rayîrê aşîtî, heq û huqûqî esas gîna, meseleya kurdan bi dîyalog û muzakereyan çareser kena, ya zî rayîrê şerî û şîdetî esas gêna. Eke Dewleta Tirkîya rayîrê aşîtî, demokrasî, heq û huqûqî esas bigêro, na mesela hinê kok ra çareser bena. Tirkîya Rojhilatê Mîyanênî de bena model û vernîya Tirkîya abena û heme hewa ra aver şona. Dewleta Tirkîya şer de israr bikero, qaosî ra vêşêr, hesrê çiman ra vêşêr û xizanîye ra vêşêr yewna çîy nêana. Nê pancas serrî yo ke, xo ra şer beno û netîce orte de ya. Rayîrê aqilî yew o, no rayîr zî rayîrê aşîtî û pêâmeyîşî yo.