Alî Riza Arslano ke dejê lajê xo anjeno vat ke çimê ey tim rayîr de û goşê ey telefon de bî. Ey wina qisey kerd: “Heta sibata 2021î ez pê hêvîya ‘ewro do agahî bêra’ ciwîyaya.”
Hakan Arslano ke wextê qedexeyê tebervejîyayîşî yê Sûrê Amedî de 2ê kanûna 2015î de şehîd bîbî esteyê ci 7 serran ra dima hetê Dozgerîya Komare ya Amedî ra zerreyê yew tewreyî de dîyabî babîyê ci. Fotografo ke tede babî Arslan verarê ci de pê tewreyî Edlîyeya Amedî ra vejîyeno bî sebebê nêrazîbîyayîşan.
Babî Alî Riza Arslanî ANFyî rê qala ci kerde ke 6 serran senî xîret kerd ke cenaza bigêro û wexto ke cenaza girewtbî çi hîs kerdo.
Keyeyê Arslanî yo ke 9 kesan ra yeno pê, dewa Çavuşkoyî ya qezaya Qereyazî ya Erziromî de ciwîyeno û keyeyêko welatperwer o.
Babî Alî Riza Arslanî ard ziwan ke Hakan domanîya xo ra nata tim kesêko rêzdar û wayîrferaset bîyo. Ey da zanayene ke Hakanî dewe de hetkarîya ey kerdêne la hamnanê 2015î de ey vat ke wazeno şoro Stenbol de kekanê xo reyde bixebito, înan zî verê ey nêgirewto.
Babî Arslanî wina dewam kerd: ”O karê tekstîlî de xebitîyayêne. Mi waştêne ey bida zewijnayene. Dadîya ci ey rê telefon de qala zewajî kerde, ey zî vato ‘Wextnê dima.’ Nê qiseykerdişî ra dima 8 rojan ma nêeşkayî xo biresnê ey. 7 mengan û 20 rojan ra dima televîzyon de xeberan de ma dî ke o Sûr de şehîd bîyo. Xora na xebere ra çend rojî verî mi tim çîyêko xirab hîs kerdêne. Mi dewe de embazanê xo rê vat ke ‘Ez wina hîs kena ke çîyêk ameyo sereyê lajê mi’ û xora şan zî mi a xebere dîye.
Ez cade kewta rayîr şîya Amed. Uca de zî mi eşnawit ke lajê mi şehîd bîyo. Embazêkê ey ez dormeyê Sûrî de çarnaya, mi rêçê linga Hakanî hîs kerdêne. 6 serran mi kerd ke cenazaya lajê xo bigêra. Rayêk zî seba ke çimê mi bitersnê înan ez 10 rojan tepişta. Nê 6 serrî mi rê bîyê zindan. Tim çimê mi rayîr de, goşê mi telefon de bî. Heta sibata 2021î ez pê hêvîya ‘ewro do agahî bêra’ ciwîyaya. Sibata 2021î de dewlete mi rê telefon kerd ke cenaza Sûrî ra ameya vetene. Dima ke cenaza ameye vetene ez û cinîya mi ma 3 mengan seba testê DNA gonîye daye. Netîceya testî ra dima cenaza erşawîyaye Dezgehê Tipê Edlîyî yê Stenbolî. 9 mengan uca de mende. 25ê tebaxe de avûkatî telefon kerd û vat ma eşkenê cenaza bigêrê. Ma amadekarîyê xo kerdî û dişeme kewtî rayîr.
Mi vatêne qey ez cenaza Dezgehê Tipê Edlîyî ra gêna. Ma vatêne qey ma seba karanê fermîyan şinê edlîye. Çunke înan nêvat ke uca de cenaza do bidê ma. Dima înan cenaza arde, tewre akerd, tira CDyêk vet û tewre da mi. Wexto ke mi esteyî dîyî, zaf dejaya. Mi înan rê vat ke ‘şima cenaza wina danê mi?’ Înan vat Dezgehê Tipê Edlîyî ra wina ameyo, ê zî wina danê. Mi fekê tewreyî girê da, vist verarê xo û vejîyaya teber. Çew nêeşkayêne nê halî de îdare bikero la Homayî îrade da mi û mi îdare kerd.”
