Muharrem Aralî dîyar kerd ke Serekê PKKyî Abdullah Ocalanî bi qalê ‘Kurdîstan kolonyal o’ şar rêxistin kerdo û no yew wayîrê girîngîyêka tarîxî yo. Aralî vat: “Netîceya nê rêxistinbîyayîşî de dewleta tirke tersaye û Darbeya 12ê Êlule kerde. Dewlete zîndanî bi kurdan pirr kerdî. La zîndanan de xoverdayîş bi û Mazlûm Dogan zî sembolê nê xoverdayîşî bî.

1983 de ez Gelîya Beka de bîya. O çax şerwananê azadîye seba têkoşînê çekdarî hem perwerdeyê leşkerî hem zî sîyasîyî girewtêne. Rayberîye vatêne ke bi destpêkerdişê têkoşînê çekdarî NATO do mudaxele bikero. Wina zî bi. 

Aralî ard ziwan ke Hemleya 15ê Tebaxe ra dima kedkaranê Tirkîya zî waşt tewrê têkoşînê azadîye bîbê û wina vat: “Çike paradîgmaya Rayberîye nînan ser o zî tesîr kerdbî. Darbeya 12ê Êlule zî rewşa sîyasîye teng kerdbî. O çax xeylêk kurdî neçar mendêne ke koçê Ewropa bikerê. 15ê tebaxa 1984î de heme dîyaye destpêkerdene. Hem Kurdîstanî ra hem zî Ewropa ra ciwanan waştêne tewrê têgêrayîşê azadîye bibê. Serkêşîya Rayberîye de şar ame rêxistinkerdene û ney zî cesaret da şarê kurdî. Bi nê hawayî têgêrayîşê azadîye her ke şî bî pîlêr û xurtêr. 

Têkoşînê têgêrayîşê azadîye de embaza ma Sakîne Cansize (Sara) Zîndanê Amedî de sey qehremanêke xo ver da. Cinîyan ê kurdan bi nê hawayî serkêşîya îdeolojî û têkoşînê çekdarî kerde. 

Şarê kurdî ganî rêxistinî, perwerdekerdiş û xopawitişî aver berê. Ma wextêkê winayênî de yê ke têkoşîn her çaxî ra girîngêr o. Labelê ganî ma her hetî ra xo xurtêr bikerê. Xoverdayîş û têkoşîno rêxistinkerde do azadîya ma bîyarê. Seke Rayberîye vatbî ‘Ma bi ciwanan dest pêkerd û bi ciwanan do ser bikewê.’ ”