Şaxa Komeleya Mafên Mirovan (ÎHD) a Amedê û Xizmên Windakirayan di hefteya 729’an de bi dirûşmeya “Bila winda bên dîtin û kujer bên darizandin” çalakiya xwe li ber Bîrdariya Mafê Jiyanê ya Parka Koşûyolû ya navçeya Rezan a Amedê li dar xist. ÎHD’ê û Xizmên Windakiriyan di çalakiya xwe ya vê hefteyê de li aqûbeta Serokê HADEP’ê yê Navçeya Silopiyayê Serdar Taniş û rêviberê partiyê Ebubekîr Denîz ên ku di sala 2001’ê de çûn fermandariya cendirmeyan a navçeya Silopiyayê û piştre careke din agahî ji wan nehat girtin, pirsîn.
Di destpêkê de Sekreterê Şaxa ÎHD’a Amedê Yakûp Guven axivî. Guven anî ziman ku ji ber nasnameya kurdbûnê mirov hatin qetilkirin û windakirin û wiha got: “Sedema pirsgirêkên heyî jî neçareserkirina pirsgirêka kurd û polîtikayên zext, tundî û bişaftinê ku li dijî kurdan tên bikaranîn in. Di meha hezîranê de gelek rojnamegerên kurd hatin girtin. Lê piştî ku rojnameger hatin girtin tevî ku ew qas dem derbas bû jî der barê wan de tu îdianame nehat amadekirin. Her wiha ji bo girtina wan tu delîlekî şênber jî tune ye lê rojnameger bi awayekî keyfî tên ragirtin. Em jî weke ÎHD dibêjin bila rojnameger demildest bên berdan. Sepanên girtine ji bo pêşî li sucan bê girtin heye lê mixabin wekî her car niha jî ew sepan ji bo serîtewandina rojnamegerên kurd tê bikaranîn.”
Êlih
Xizmên Windakiriyan û endamên ÎHD’ê li cadeya Gulistan a Êlihê çalakiya xwe ya vê heftê li dar xist. Di çalakiyê de pankarta, “Bila winda bên dîtin û kujer bên darizandin” dinivisî û wêneyên kesên ku hatine windakirin hatin hilgirtin. Parlamenterê Partiya Demokratîk a Gelan (HDP) yê Êlihê Necdet Îpekyuz û rêxistina HDP’ê ya Êlihê jî di çalakiyê de amade bûn. Di çalakiya vê heftê de li aqûbeta Mehmet Şîrîn Maltû yê 17 salî hat pirsîn.
Daxuyaniya vê heftê ji aliyê rêvebera ÎHD ya Êlihê Gulbahar Kaya ve hat xwendin. Kaya, destnîşan kir ku di 31’ê çileya 1995’an de li gundikê Zediya navçeya Hezo ya Êlihê lêşker, tîmên taybet û cerdevanên gund jî di nav de bi panzeran di ser mala Mehmet Şîrîn Maltû (17) de girtine û heta seat 04.00’an îşkence li Maltû kirine. Kaya, anî ziman ku piştî îşkenceyan Maltû bi wesayitekê dibin û axaftina xwe wiha domand: “Roja din saet di 12.00’an de dest û lingên wî girê dane û anîne gund. Di îşkenceyê de ji Maltû xwestine ku ji wan re cihe çek û wargehên PKK’ê bêje. Tevî ku Maltû gotiye ez nizanim jî îşkenceyê berdewam kiriye. Piştre lêşker careke din wî dibin û edî agahî ji wî nayê standin. Tevî serlêdanan jî malbat nikare encamekê bi dest bixe.”
Satenbol
Li aliyê di heman demê de Dayikên Şemiyê li Stenbolê li aqûbeta Ahmet Şayik û Mehmet Tayboga yên 29 sal berê ji aliyê leşkeran ve hatin binçavkirin û carek din agahî ji wan nehat girtin, li ser xeta online pirsîn.
Dayikên Şemiyê /Mirovên Şemiyê ji bo li aqûbeta windayan bipirsin û kujer werin darizandin û cezakirin di hefteya 931’emîn de çalakiya xwe online li dar xist.
Dayikên Şemiyê vê hefteyê li aqûbeta Ahmet Şayik û Mehmet Tayboga yên di 7’ê çileya 1994’an de li Midûriyeta Gumrukê ya Xabûrê ya navçeya Silopiya Şirnexê dixebitîn û piştî ji kar derketin û ji aliyê leşkeran ve hatin binçavkirin û carek din agahî ji wan nehat girtin, pirsîn. Daxuyaniya vê hefteyê ji aliyê Ayşe Tepe ya xwişka Ferhat Tepeyê nûçegihanê rojnameya Ozgur Gundemê ku di sala 1993’yan de hatibû qetilkirin ve hat xwendin.
