Amedijî rîyê krîzê ekonomîk û zêdîyayîşê vayan ra nêeşkenê debara xo bikerê.
Krîzo ekonomîk û zêdîyayîşê vayan tesîrê cuya Amedijan kenê. Tayê merdimî çopan ra werdî arê danê, tayê merdimî zî tewr nêeşkenê nanî berê keyeyê xo.
Îrfan Emînogluyo ke bazar de yew dezgehê ci est o ard ziwan ke merdimî nêeşkenê sey verî pîzeyê xo mird bikerê û vat: ”Vaya her çîyî 3-4 qat zêdîyaya. Ma nêeşkenê çîyêkî biroşê. Kîloyêkê poşetan 12 lîra ra bî 35 lîra. Ma cara 100 lîra danê poşetan. Çew zî vera ney nêvejîyeno. Ma senî debara xo bikerê?”
Medîne Kara pare kerd ke vayan ra nêeşkena bazarî ra çîyêkî bihêrîna û vat: ”Merdimî mehf bîyê. Ma kenê ke pê meaşê teqawutî xo bidevirnê la meaş ma rê nêvejîyeno. Vayî vera zêdîyenê. Ma wazenê çîyêkî bihêrînê la ma vînenê ke vaya vizêrîne bîya di qat.”
Azîz Kayayî dîyar kerd ke vaybîyayîşê benzînî tesîrê her kesan keno û vat: ”Her roje vayê neweyî yenê. Merdimî pê zorî debara xo kenê. Meaşo asgarî bîyo 4 hezar 250 lîra la zeman ra meaş di rojan de qedîyeno. Eke destê mi de bibo ez kontakî qefilnena, protesto kena.”
Zumrete Uyam da zanayene ke xizanîye vera vila bena û vat: ”Ma pê 100 lîra yenê bazarî la nêeşkenê pê çîyêkî bihêrînê. Verî ma pê 50 lîra poşetê xo kerdêne de. Hem her çi beno vay, hem zî bêkarîye zêdîyena. Hînî her kes vera xizanîye şer keno.”
Esnaf Nurullah Esenî vat ke ne şar ne zî esnafî eşkenê meywe û sebzeyan bihêrînê û wina dewam kerd: ”Hele biewnê şarî, şar pêrîşan bîyo. Nê vayî zerar danê her kesî. Merdimî nêeşkenê kîra bidê, senî çîyêkî bihêrînê? Merdimî vêşan kewenê ra, neçare manenê ke çopan ra çîyêk arê bidê. Ma wazenê no krîz biqedîyo.”
Esma Guçlu vat: ”Na rewşe tesîrê feqîran kena, zengînan rê çîyêk nêbeno. Ez venga Erdoganî dana; hînî bes o! Wa vayî bikêmîyê. Ma nêeşkenê çîyêkî bihêrînê. 5 lîtreyê rûnî 33 lîra bî la nika 170-180 lîra yo.”
Mehmetşah Urgutî vat: ”Yew kîloyê firîngî 12 lîra bîyo. Ma nê vay û krîzan ra nêeşkenê xo bidevirnê. Yew pêlekê ardan bîyo 400 lîra. No pêlek têna 10 rojan ma rê vejîyeno. Ma her roje bi vayêka neweye hişyar benê.”
Îlhamî Tayarî vat: ”Ma sey esnafan rewşêka zehmete de yê. Ganî dewlete ca de mudaxeleyê nê vayan bikera. Şar vêşanîye ra şino la ê keyeyanê xo de bi rehetî ciwîyenê. Dewletêka winasêne wa tewr nêba. Ez tira nêvana dewlete.”
