Hemsereka MED-DERî Şîlan Elmas Kane û Hemserekê HDPyî yê Amedî Zeyyat Ceylanî venga her kesî da ke tewrê rayraşîyayîşê Roşanê Ziwanê Kurdkî yê 15ê Gulane bibo.

Aktîvîteyê Roşanê Ziwanê Dayîke yê 15ê Gulane Amed de dewam kenê. Aktîvîteyî 15ê gulane de bi rayraşîyayîşêk do biqedê. Hemsereka Komeleya Cigêrayîşanê Kultur û Ziwanî ya Mezopotamya (MED-DER) Şîlan Elmas Kane û Hemserekê HDPyî yê Amedî Zeyyat Ceylanî derheqê rayraşîyayîş û roşanî de qisey kerd.

Şîlan Elmas Kane bale ante tedaya vera kurdkî ser û vat ke kurdkî yena çinkerdene. Kane da zanayene ke ê do rixmê pêro tedayan zî kurdkî bipawê û îfade kerd: “Eke ma wayîrê ziwanê xo mevejîyê tedaya dewleta tirke do bizêdîya. 15ê gulane de saete 16.00 de wa şarê ma tewrê rayraşîyayîşê ‘Ziwanê kurdkî wa bibo ziwano fermî’ bibo.”

Zeyyat Ceylanî pare kerd ke seba ke kurdkî çin nêbo ganî kurdî wayîrê ziwanê xo vejîyê û vat: ”Eke kurdkî nêbo ziwanêko fermî û ziwanê perwerdeyî ma ganî wayîrê ziwanê xo vejîyê. Seba ke dewlete ziwanê ma bişinasa ganî ma têkoşînê xo pîlêr bikerê. Ma ziwanê xo bimusnê domananê xo. 15ê gulane de Parka Koşuyoluyî de ma do ‘Rayraşîyayîşê Ziwanî’ bikerê.  Ma venga pêro amedijan danê ke tewrê nê rayraşîyayîşî bibê.”