Partîya Karkeranê Kurdîstanî (PKK) 12ê gulane de encamnameyê kongreya xo ya 12. eşkera kerd û şehadetê di pêşeng û awankerdoxanê xo Alî Haydar Kaytan û Riza Altunî dîyar kerd. Kongre dîyarî Alî Haydar Kaytan û Riza Altun ameye kerdene. Eşkerayîya PKK’yî ra pey xeylê şaristanan de Alî Haydar Kaytan û Riza Altun ameyê vîrardene. Amed de zî bi pêşengîya MEBYA-DER,  DEM Partî, DBP’yî bi beşdarîya xeylê kesan pêşengê PKK’yî Qada Şêx Seîdî de ameyê vîrardene. Bi hezaran kesî beşdarî vîrardişî bîyî. Welatijî ke beşdarê vîrardişî bîyî rojnameya ma rê qisey kerd.

Kurdan bîyayîşê xo yê dîyine viraşt

Welatij Hidir Karataşî dîyar kerd ke, Ewro roj roja vîrardişê qahremanîye yo, her di embazê qehremanî Alî Haydar Kaytan û Riza Altunî embazê Serek Ocalanî bî û pîya xebat kerd û PKK awan kerde û arde na merhaleye. Karataşî ana ard ziwan vat: “Tarîxê kurdan de ma ewro ewnênê ke dewleta tirk ziwanê kurdan, nasnemeyê kurdan, kulturê kurdan û kesayetîya kurdan nasnêkerda û qedexe kerda. Goreyê vatene înan ‘Kurdî kiştî bî û koyê Agirî de kerdbî mezele û ser beton kerdbî.’ Ewro bi saya Rayberîya Serek Ocalanî û hevalê î kurdî ameyê nê merhaleyî û sernawera ganî bîyî û bîyayîşê xo viraşt.”

Karataş wina domna û vat: “Nê porosesê newî ra Serek Ocalanî 27ê sibate de yew vengdayîşêk kerd û no vengdayîş zê yew menîfastoyî bi.  Nê pêvajoyê newî sernawera bîyîşê dîyinê yê kurdan o. Kurdî yewbîyayîşê xo her roj hîna zaf xort kenê û kongreya xo viraşte. Kongre di rojî dewam kerd û însatîfê demokratîkî viraştî. Rojawan de qamişlo de zî konferansê xo viraştî. Rojawanî de serkewtişeko pîl viraşt. Nê vîrardişê her di şehîdan ez yadkena û rûmetîya înan ra rêz gêna.”

Heqê kurdan qanûnê bingeyînî de bêro qebûlkerdiş

Welatij Mustafa Akbulutî zî vat: “Ewro roj roja dîrokîya. Ez her di şehîdan Alî Haydar Kaytan û Riza Altunî yad kena û ma her dem deyndarê şehîdanê xoyê.”

Akbulutî wina vat: “Eke no pêvajo ser bikero se, meseleya heme kurdan û şaran çareser bena. Kurdî wazenê ke ziwan, kultur û nasnameyê înan bêro şinasnayîş û bi fermîyeti de qanûnê bingeyînî de bêyro qebûlkerdiş. Seba ke, eke na komara tirkîya awan bîya, bi saya kurdan ra awan bîya. Nê sebeb ra zî kurdî zî hewyêke tirkan senîhewa wayîrê yew heq û huqûqîyê ganî kurdî zî seypê bibê û pîya bicîwîyê.”