Amed de bi des hezaran kes beşdarê mîtîngî bî ke bi dirişmeya “Seba Aştîye û Azadîye” ameybî organîzekerdene. Mîtîngî de ke temsîlkarê rêxistinanê sîyasîyan û komelê sivîlan, hemwelatîyê bajaranê cîya-cîyayanê Kurdistanî beşdar bîyî, sloganê “Biciwîyo Serok Apo”, “Bê serok ciwîyayîş nêbeno” û “Jin, jiyan, azadî” ameyî vatene.
Hemsereka Pêroyî ya DBP’yî Çîgdem Kiliçgun Uçar, Hemserekê Pêroyî yê DEM Partî Tuncer Bakirhan, aktîvîsta TJA’yî Çaglar Demîrel û dayîkêka aştîye sey qiseykerdoxan mîtîng de qisey kerd. Hemserekê Pêroyî yê DBP’yî Keskîn Bayindir, parlamenterê DEM Partî û CHP’yî û hemşaredarê bajar û qezayan zî neşdarê mîtîngî bîyî.
Qiseykerdoxan ke beşdarê mîtîngî bîyî înan ra Mamosta Bahrî Bîrtaneyî bale ant ke Rojhelatê Mîyanênî de newe ra xerîta vurîyena û ganî verê tecrîd bêro wedarnayene ke PKK bi hawayêko asan fikirê xo şarî reyde par bikero. Bîrtaneyî va “Kurdî hîna kurdê verênî nîyê. No rayîr rayîrê aştî û demokrasî yo tewr rind o. Ma bi heyecan paweyê peyamê Ocalanî yê 15ê sibat ê.”
Mamosteyo teqawit Yahya Aslanî dîyar kerd ke eke tecrîd dewam bikero Ocalan nêeşkeno rolê xo kay bikero. Aslanî qeyd kerd ke dewlete ganî verê zîhnîyetê xo bivurno. Ey va “Yew het ra Tişrîn de qirkerdişê sîvîlan dewam keno heto bîn ra qeyûmî yenê tayînkerdene. Bi nê zîhnîyetî aştî çareser nêbena. Seba ke Ocalanî 7 madeyî dîyar kerdî ganî dewlete nê madeyan ra berpirsîyar bo.”
Endamê meclîsa şaredarîya Peyasî Edîp Bînbîrî zî va “No têkoşîno ke ni serran o ke dewam keno ganî hîna xurt bibo. Hêvîya ma est a ke no rayîr rayîrê demokrasî û aştî bo.” Bînbîrî dîyar kerd ke destgirotişê Bahçelî qîmetdar o la dewlete hema gamêk aver nêeşta. Ey qiseykerdişê xo de qeyd kerd ke ganî dewlete peyamê Ocalanî ra hîsdar bo û rayîrê demokrasî û aştî akero ke kurd û tirk pîya bi aştî biciwîyê.
Şarê ke beşdarê mîtîngî bîy, înan ra Salîh Açikguzî zî bale ant ke dewlete demê vîyartî ra heta ewro planê A-B-C viraştê û aştî ra netîceyêko rind nêvejîya. Açikguzî dîyar kerd ke 2013 de demê aştî dest pêkerd la bi hawayêko komplo 2015 de qedîya. Ey qeyd kerd ke ewro dewlete Rojhelatê Mîyanênî de seba ke rîskê statuya Rojawanî est o reyna kewta cehkerdişanê plananê A-B-C. Açikguzî qiseykerdişê xo wina qedêna: “Her çi bibo wa bibo, do serkewtişê aştî bibo û peyamê Rêzdar Ocalanî peyamê heme kurdan o.”