Cinîyê ke beşdarê mîtîngê Amedî bîyî mîyanê înan de Hemsereka HDP’yî ya verêne Gulîstan Atasoy, Hetkara Şaredarîya Peyasî Gulistan Nazlier, Endama Şaredarîya Peyasî Mîna Karakaş, Sîyasetmendare Hafîze Îpek, Sîyasetmendare Guller Turhali û Sîyasetmendare Melîha Gurlek est bî.
Vengdayîşê mesajê Ocalanî morê xo da 8ê Adare ro
No vengdayîşo tarîxî kewt heme war û kuçeyan. Seba 8ê Adare mesajê Serekê PKK’yî Abdullah Ocalanî ame wendiş û heme cinî wayîrê nê mesajî vejîyayî.
Hemsereka HDP’yî ya verêne Gulîstan Atasoy va: “Emser pîrozkerdişê 8ê Adare zaf taybet o, çimkî vengdayîşê deklarasyonê Rayberê PKK’yî Abdullah Ocalanî – vengdayîşê komelê aştî û demokratîkî – morê xo da 8ê Adare cinîyanê cîhanî ra. Nê vengdayîşê tarîxî kewt heme war û kuçeyan. Seba 8ê Adare mesajê Serekê PKK’yî Abdullah Ocalanî ame wendiş û heme cinî wayîrê nê mesajî vejîyayî. Cinîyan va ke ‘Ma peyê nê mesajê tarîxî de yê û ma heme hetî ra piştî danê nê mesajî. Cinî vera şîdetî û zordarîya pergalî rêxistinîya azadî hîna zaf berz kerd.'”
Atasoy wina qedêna: “Nika cinî bi rêbazê raştîya komelkîya azadî, demokrasî û aştî ra heme tewr ra wayîrê îradeyê xo vejîyenê. Ma 8ê Adare de heme cinîyanê cîhanî dawet kenê.”
Riza koletî şikîyaya
Hetkara Şaredarîyê Peyasî Gulîstan Nazlier dîyar kerd ke: “8ê Adare rojê kedkarê cinîyanê Cîhanî yo û ez pîroz kena 8ê Adare. Vengdayîşê mesajê Rêzdar Ocalanî tarîxî yo û pîroz o. Hêvîya ma est a ke hîna rayîrê aştî û demokrasî abo. Pîrozîya 8ê Adare qada îstasîyonî de cinî pêro ameyî têhet û yew ca, bi coş û heyecan pîroz kerd û wayîrê îradeyê xo vejîyayî. Cinîyê kurd vera şîdetî û zordarî ra rêza koletî şikitî. Bi nê wesîleyî ez 8ê Adare cinîyanê cîhanî ra pîroz kena. Cinî wayîrê îradeyê xo vejîyayî û piştî dayî nê mesajê vengdayîşî. Bawerîya ma esta serkewtiş hîna zaf nêzdî yo.”
Emser 8ê Adare beno wesîleyê serkewtişê azadî û demokrasî
Endama meclîsa Şaredarîya Peyasî Mîne Karakaş vat: “Ez verên ra 8ê Adarê cinîyanê cîhanî pîroz kena. Ewro qada îstasîyonî de zaf coş û heyecan esto. Ganî no coş û heyecan her dem bidomîyo. Bi taybetî zî seba cinîyan ra mesajê Serekê PKK’yî ame wendiş û hîna zaf coşî virazîya. Cinî bi zelal mesajê Rayberê PKK’yî ra wayîr vejîyenê û seba awankerdişê komelê demokratîk û aştî hîna zaf rêxistinîya xo berz kenê. Emser 8ê Adare beno wesîleyê serkewtişê azadî û demokrasî.”
Dem demê azadîya cinîyan a û serkewtişî ya
Sîyasetmendare Hafîze Îpek va: “Ez bi şexsê nameyê cinîyê kurdan ra rojê xoverdayîşê kedkarê cinîyê cîhanî pîroz kena. Xoverdayîşê cinîyê kurd, rêxistinîya komelkî esasî gêno. Heyanî cinî azad nêbê, komel zî azad nêbeno. Azadbîyayîşê cinîyan rewşêka xorîn a, hama ancax azadbîyayîşê cinîyan viraştişê sosyalîzmî ra vêreno. Qada îstasîyonî de, bi wesîleyê pîrozkerdişê 8ê Adare, vengdayîşê mesajê Rêzdar Ocalanî tarîxî bî û heme ma cinîyê kurd wayîrê vengdayîşê mesajî vejîyenê. Dem demê azadîya cinîyan a û serkewtişî ya.”
Ewro bi hezaran ra cinî xoverdayîşê xo berz kenê
Sîyasetmendare Melîha Gurlek va: “Ez 8ê Adare cinîyan a cîhanî pîroz kena. Heyanî ewro cinî vera şîdetî û zordarîya pergalî ra zaf zor û zahmetî dîya. Pergalê camêrdî vano ‘wa cinî her wext bikişîyê û biqedîyê’. Na rêxistinîya cinî 12ê kesan ra dest pêkerde û ewro zî bi hezaran reyde cinî xoverdayîşê xo danê û wayîrê îradeyê xo vejîyenê. Rêxistina xoverdayîşê cinîyan Rojavayî de morê xo da şoreşîya Rojavayî ra. Vengdayîşê mesajê Rayberê PKK’yî Abdullah Ocalanî mesajê ma heme kesan o. Ma heme cinîyê kurd peyê nê mesajî de yê. Ma verê vatêne ‘Çi jin çi şêyr, ma enkazî vanê jin jîyan azadî’.”
Cinî zaf rojê giranan ra vîyartî
Sîyasetmendare Guler Turhali dîyar kerd: “Ez roja 8ê Adare ya cinîyanê cîhanî û taybetî kurdan pîroz kena. Cinîyê kurd zaf roja giranan ra vîyartî la ewro cinîyê kurd xoverdayîşê xo, têkoşîna xo zaf berz kerda. Qada îstasîyonî de pîrozkerdişê 8ê Adare zaf muhîmîya xo arz keno. Destpêka raverîya demokratîk aştî û demokrasî ma heme cinîyan ra rayberî keno. Bi taybetî nê 8ê Adare wendiş mesajê Rêzdar Ocalanî zaf muhîm bi û ma heme cinîyê kurd peyê nê mesajî de yê. Ganî heme kes wayîrê nê mesajê tarîxî vejîyo û destê xo binê kerra ra bikero. Serkewtişê azadîya cinîyan, serkewtişê heme azadîya komelkî yo.”
