Merkezê Partîya DEM’î Amed de, seba Komxebata Aştî û Komelê Demokratîkî, Merkezê Kulturê  Çand Amedî de  kom bîy. Îdarekerê Merkezê Partîya  yê DEM’î Remezan Karakaya, derheqê Komxebata de û çareserkerdişê meseleyanê şarî ser o wina vat; “Ma heme sazî, dezgeyê komelê sivîlî yê demokratîkî bêyerê pêser, çareserkerdişê meseleyanê şarî ser o munaqeşe bikerê.  Ma wazenê ke, no war de, her kes fikrê xo vajo, pêşnîyazanê xo bikero.  Karakayayî wina domna, “Her cayan de, dewan de, qezayan de, taxan de, meseleyê şarî estî.  Feqîrî, belengazî, seba sînoran pirodayîş û kiştiş esto, nezanî esta, bêziwanî esta, bêperwerdeyî esta, remnayîşê kênekan esto.

Ganî rêxistinî  xort bibê

Karakayayî wina ard ziwan; ” Ganî nê meseleyî pêro çareser bibê. La ganî verê verkan, ma xo mîyan de yewîtîya xo virazê, eke ma xo mîyan de yewitîya nêvirazê, ma nêeşkenê ke çekî bikerê. Ma wazenê ke heme kes wa na komxebate de fikrê xo vajo û pêşnîyazanê xo bikero”. Hinê badî zî ma rêxistinîya xo awan bikerê, heyana rêxistinbîyayîş nêbo, ma nêeşkenê  çekî bikerê.

Wa Heme kes destê xo bikerê binê kerrayan

Karakayayî vat; “Ma ganî dewe bi dewe, qeza bi qeza, taxe bi taxe û keye bi keye bigeyrê meseleyanê  şarî çîyê se, ma halbikerê. No war de, ganî her kes verê verkan, keyeyê xora dest pêbikero, cîranê xora û embaz û merdimanê xo ra dest bi xebate bikero. Nê meseleyi; yê partîyanê sîyasîyan, şaredarîyan û yê heme komelî yê. Ganî heme kes, destê xo binê kerra ra bikero û nê meseleyan se meseleyanê xo biveyno.

Karakayayî peynî de wina vat. ”Xora no pergal wazeno ke, ma xo bi xo yewbînan bikişê û yewbînan ra dûrî bikewê. Wazenê ke gedeyê ma bikewê kar û gureyê eroyîn, esrar, selefwer û fuhûşî. EYro vera tîryakêşî û fuhûşî yew meş esto . Armancê nê meşî pîroz o û eynî wext de zî yew mesaj dêno dewlete. Ma hînê nê pergalê qirêjinî qebûl nêkenê û ma vera na qirêjî têkoşîn danê.

Hemserekê Pîranî  Yuksel Bozkurtî, seba na komxebate wina vat; “Rayberê Şarê Kurd Abdullah Ocalanî,  seba nê prosesê newe ra bi yew deklarsîyonî vengdayîş kerd û no vengdayîşê ey heme dinîya de yew gulbang da. Heyana eyro zaf bedelî ameyê dayîş.

Ganî heme waran de xebate bibo

Yukselî vîna vat; ” Na komxebate de, wa her kes fikrê xo vajo  û ma zî şarî mîyan de, nê fikranê xo bare/pare bikerê. Seba înşakerdişê komelî neweyî, xebata anketan hewce kena. Hima zî  şarî mîyan de tayê merdimê ma, hayîdarê  prosesê neweyî nîyê. Ganî ma zî, bidê şarî fehmkerdiş.” Yukselî wina qedêna, “Ganî verê verkan, seba prosesê neweyî,  perwerdeyî bêro dayîş û rêxistinî  xo xort bikerê.”