Cinîyî Sûrê Amedî de çarçewaya aktîvîteyanê 8ê Adare de ameyî têhet. Cinîyan deyîrî vatî û govende girewtî. Kuçeyê Sûrî pê sloganê ”Cinî, cuye, azadîye” zimayî.
Rêxistinanê cinîyan ê amedî çarçewa aktîvîteyanê 8ê Adare Roja Cinayan ê Kedkeran a Dinya de aktîvîteyêke organîze kerde.
Aktîvîstê Tevgerê Cinîyanê Azadan (TJA), Komeleya Cinîyan a Roza, endamê Partîya Demokratîke ya Şaran (HDP) û xeylêk cinîyî verê Camîyê Tarîxî yê Sûrî de ameyî têhet. Rixmê şilîyî cinîyî pê kincanê xo yê herêmîyan xeylêk wext erbaneyî kuwayî, deyîrî vatî û govende girewte. Cinîyî bi vengê berzî qîrayî û slogana ”Cinî, cuye, azadîye” eşte.
Dima ra Hemsereka HDPyî ya Amedî Gulîstan Atasoye qisey kerd. Atasoye vat: ”Çîyo esas oyo ke haştîye bêro mandene. Şer eserê sîstemê çînkerdişî yê camêrdan o. Cinîyî do hem wisar hem zî haştîye bîyarî. Cinîyê sîyasetmedarê ke zîndan de yê ma do beraqa înan berze bikerê. Îtîfaqê cinîyan do sîstemê nêrî birijno. Ma do kuçe kuçe bigêrê û paştdayîşê cinîyan bimanê.”
Badê eşkerayîye cinîyan waşt vilawekan vila bikerê la polîsan destûr nêda. Cinîyan bi sologana ”cinîyan rê nê kiştoxan rê barîkat” û deyîra ”Xover bidê Dîyabekir, xover bidê” polîsî protesto kerdî. Cinîyan pê deyîranê Pinar Aydinlar binê şilîyî de govende girewte.
Cinîyan dima ra sey grûban vilawekî vila kerdî. Cinîyî heta PTTyî pê sloganan rayra şîyî, semedê tewrbîyayîşê çalakîyanê 8ê Adare veng da û tîya ra cinîyan ê tepişteyan rê kartê 8ê Adare şawitî. AMED
