Amedijî rixmê astengîyan 15ê Gulane Roşanê Ziwanê Kurdkî fîraz kerde. Rayraşîyayîş de ame vatene: “Bê ziwan cuye nêbena.”

Serkêşîya Platformê Ziwanê Kurdkî û Torra Ziwan û Kulturê Kurdan de bi wesîleya 15ê Gulane Roşanê Ziwanê Kurdkî Amed de girseyan rixmê astengkerdişê polîsan zî çalakîyêka rayraşîyayîşî û eşkerayîye kerde.

Verî polîsan taxa Bayramogluyî de verê rayraşîyayîşî girewt la girseyî rixmê astengîyan zî sloganê ‘Bê ziwan cuye nêbena’ vat. Girseyî pankart û dowîzê sey ‘Wa ziwanê kurdkî biba ziwano fermî û ziwanê perwerdeyî’ akerdî. Girse ver bi Parka Avedîkî şî û tîya de eşkerayîyêka hempare daye.

Hemserekê Komeleya Cigêrayîşanê Kultur û Ziwanî ya Mezopotamya (MED-DER) Rifat Ronîyî îfade kerd ke kurdî wazenê mîyanê aştîye de biciwîyê. Dewleta tirke peynîya peynî de do kurdan ra uzrê xo biwaza.”

Vervatoxê Platformê Ziwanê Kurdkî Şerefxan Cizîrîyî astengkerdişê polîsan şermezar kerd û vat: “Sîyasetê înkarî bîyo sebebê şerî û cîyakerîye. Eke ê cuya hempare wazenê wa verê kurdkî ra astengîyan wedarnê. Wa kurdkî biba ziwanê perwerdeyî û ziwano fermî. Ganî kurdî keye, kuçe, şaristanan û her ca de bi ziwanê xo qisey bikerê.”

Hemsereka MED-DERî Şîlan Elmas Kane zî bale ante astengkerdişan ser û vat: “Şarê kurdî vera hêrişan pê ziwan û nasnameyê xo do têkoşînî pîl bikerê.”

Kane da zanayene ke seba ke siba maçê Amedspor-Tarsus Îdman Yurdî esto ê konserê fînalî do 17ê gulane de bikerê.

Eşkerayîye pê sloganan qedîyaye.