Hemvervatoxê Partîya Çep a Keske Îbrahîm Akinî nîqaşê peyênî ercnayî û wina vat: “Ma nêwazenê ke çîyêk zî bêro mîyankerdene. Ma bi zelalî nîqaşan bikerê la ma do rayîr nêdê nîqaşanê nîyetxiraban. Ma do nêverdê ke nîqaşî ma aciz û qels bikerê.”

Akinî vist vîrî ke prosesê weçînayîşan de dewleta tirke pêro îmkanê xo seba binvistişê Partîya Çep a Keske şuxilnayê. Akinî vat: “Rixmê hêrişan zî ganî ma kêmasî û xeletîyanê xo de têrî bibê. Ma qebul kenê ke weçînayîşan de ser nêkewtê. La reyna zî weçînayîşan de eşkera bî ke di kesan ra kesêk/e vurîyayîşî wazeno/a. Ma do nêverdê ke îqtîdarê AKP-MHPyî faturaya binkewtişê xo şaran rê bibirna. Ma do ewro xeta xo ya polîtîke dîyar bikerê û reyna bibê vervatoxê komelî û muxalefetî. Ma do sey partîyanê bînan nêkerê û nîqaşanê xo yê serê weçînayîşan bi zelalî bikerê. Şarê kurdî rixmê her çî zî weçînayîşan de bi rûmetî xo ver da û zaf eleqe mojna ma. Coka ma kurdan selam kenê. Ma qerardar ê ke pêro nîqaşanê xo şarê xo reyde û embazanê xo yê tepişteyan reyde bi hawayêkê kolektîfî bikerê. Ma nêwazenê ke çîyêk zî bêro mîyankerdene. Ma bi zelalî nîqaşan bikerê la ma do rayîr nêdê nîqaşanê nîyetxiraban. Ma do nêverdê ke nîqaşî ma aciz û qels bikerê.”

Akinî qiseykerdişê xo rê wina dewam kerd: “Ê kesê ke wazenê kurdî pêbikewê û ma nêbê vervatoxê muxalefetî, ma do verê înan bigêrê. Kongreya xo ra verî Meclîsê Partîye nê nîqaşan do bi kolektîfî bikero. Ma do nê prosesî ra hîna bi xurtî vejîyê û ver bi îqtîdarbîyayîşî şorê. Ma wazenê ke xebatê ma wa bibê wesîleya holî, rindî û aştîye.”