Serlêdanên ji bo serdema payîzê ya Akademiya Îsmaîl Beşîkçî dest pê kir. Ders wê di bin sernavê ‘Tecrûbeya Perwerdeya Kurdî’ de werin dayîn. Armanca xebata akademiyê, di qada kurdî de zanyariyan pêk bîne û belavî civakê bike.
Serdema payîzê ya Akademiya Îsmaîl Beşîkçî wê di navbera 12’ê kanûna 2020’an û 23’yê çileya 2021’ê de pêk were. Ji bo beşdariya li dersan, pêvajoya serlêdanê dest pê kir. Akademî salê du caran, di serdemên payîz û biharê de, heft hefteyandidome.
Akademî dê bi awayê onliîne pêk bê, her sal 30 xwendekarên lîsans, master an doktorayê daxilî bernameya xwe dike. Kesên beşdarî bernameyê bibin divê di asta xwendin û nivîsandinê de bi kurdî baş bizanibin. Beşdarên bi serfirazî bernameyê diqedînin, di dawiya bernameyê de sertîfîkaya beşdariyê distînin.
Bername bi 30 kesan sînordar e. Ew kesên serî lê dane, wê herî dereng di 10’ê kanûna 2020’an de bên agahdarkirin. Bernaneya akademiya payîzê dê li ser bernameya Zoomê pêk bê.
Beşdariya li akademiyê belaş e û kesên bi rêk û pêk beşdarî hemû hefteyên akademiyê bibin, wê Weqfa Îsmaîl Beşîkçî (WÎB) sertîfîkaya beşdarbûnê bide wan.
Ders wê di bin navê ‘Tecrûbeya Perwerdeya Kurdî’ de werin dayîn ku koordînatorê vê serdemê Cumhur Olmez e.
Bernameya vê serdemê wiha ye û kesên wê dersan bidin ev in:
12’ê kanûnê 2020: M.Şerif Derince, Modelên Perwerdeya Pirzimanî û Rewşa li Tirkiyeyê ji bo Kurdî
12’ê kanûnê 2020: Selda Araz, Analîza Dersên Hilbijartî: Hin Tecrûbe û Pêşniyar ji bo Perwerdeya Zimanê Kurdî
26’ê kanûnê 2020: Şehmus Kurt, Tecrûbeya Enstîtuyên Zimanên Zindî Li Tirkiyeyê: Mînaka Zanîngeha Mardîn Artûklûyê
2’yê çileyê 2021: Hewa Salam Khalid, Tecrûbeya Perwerdeya Kurdî li Başûr
09’ê çileyê 2021: Nurettin Beltekin, Ji Aliyê Felsefeya Perwerdeyê ve Perwerdeya Kurdî
16’ê çileyê 2021: Ronya Bewran, Analîza Pirtûkên Dersan ên bi Kirmanckî/Zazakî
23’yê çileyê 2021: Ronayî Onen, Hînkirina Zimên wekî Perçeyeke Aktîvîzma Zimên; Tecrûbeya TZPKurdî û Pirtûka Hînkerê. AMED
