Çewlîg û Xarpêt de dewijê ke erdlerz de keyeyê înan texrîb bîyî û şewe teber de mendî da zanayene ke selahîyetdaranê AFADî înan rê vato ‘Eke xeymî bidirîyê şima neçare yê ke 7 hezar TL bidê.”

Qezaya Depe ya Xarpêtî de 25ê hezîrane de bi girdîya 5.3î erd lerza. Erdlerzî de dewanê Depe yê Xarpêtî û dewanê Gêxî yê Çewlîgî de tay keyeyî texrîb bîyî. Dewijî qesawetî ra şewe teber de mendî. Dewijan bale ante ser ke xeymê AFADî înan rê qîm nêkenê û ganî keyeyê înan de cayê xeripîyayî bêrê viraştene.

Dewa Demîrkanatî ra Gêxî de Zekî Baykal (70) da zanayene ke dewe de 16 keyeyî estê û nînan ra 3 tenî texrîb bîyî. Baykalî vat: ”Selahîyetdaran ma de fotografê xo girewtî û şîyî. Mi xeyme nêwaşte. Eke zimistan bêro ma xeyman de senî vindenê. Ez nêeşkena keyeyê xo tamîr zî bikera. Ganî ma rê hetkarîye bêra kerdene.”

Dewa Alagozî ya Gêxî ra Yaşar Ayusî (55) vat: ”Nê banê ma erdlerzê 1971î ra dima virazîyayî la nê banî zixm nîyê. Dewe de 4 banî texrîb bîyî. AFADî ma rê vat ‘Eke xeymêk bidirîya yan zî vînî biba şima neçare yê ke 7 hezar TL bidê.’ Ma tersê ney ra keyeyê xo de mendî. ”

Dewija bîne ya Alagozî Nafîye Gokturk (65) vat: ”Ma erdlerzê 1971î ra dima şîbî Îstanbul û serrêke verî agêrayî dewa xo. Ma hînî şinê ça? Ez nêweşa qelb, astim a, nêeşkena xeyme de bimana. Tîya warê erdlerzî yo, keyeyî zixm nîyê. Wa selahîyetdarî keyeyê ma virazê.”

Dewa Kubatli ya Gêxî ra Şukru Beyazitî (61) vat: ”Dewa ma de 72 keyeyî estê, nînan ra 40 tenî texrîb bîyê la ma rê 17 xeymî ronîyayî. Ma neçare yê xeyme de manenê.” Dewija bîne Sidika Beyazit (53) vat: ”Çew seba tesbîtê xesarî nêame dewa ma. Asayîşê ma çin o. Ganî cade na mesele bêra çareserkerdene.”

Ahmet Dundar (64) vat: ”Keyeyê ma zaf lerzîya. Ma xo zor eşt teber. Keyeyê ma texrîb bi. Selahîyetdaran têna raporî nuştî la nêvat ê do keyeyanê ma virazê.”

Încî Beyaz (47) vat: ”Ma Îstanbulî ra ameyî û do reyna abigêrê uja. Ma nêeşkenê xeyman de bimanê. Ganî selahîyetdarî keyeyê ma tamîr bikerê. ”

Dewa Kuşbayirî ya Depe de zî Paşa Yaziciyî pare kerd ke dewe de 40 keyeyî estê la têna 7 xeymî dîyayî înan. Yaziciyî vat: ”Xeymî qîm nêkenê. Keyeyan de xesar est o. Me nêzanenê selahîyetdarî key yenê, ma hê pabeyê înan ê.” ÇEWLÎG/XARPÊT