Hetkarê Hemserekanê Meclîsê Rayberdişî yê Îdareyê Xoserî Hesen Koçerî derheqê rewşa multecîyanê Rojawanê Kurdîstanî de ANFyî rê qisey kerd.

Hesen Koçerî pare kerd ke Tirkîya de dewlete û îqtîdar multecîyanê sûrîyeyîjan sey hacetê şer û şantajî vînenê û vat: “Tirkîya multecîyan vera Ewropa sey gefî şuxilnena. Multecîyê sûrîyeyîjî Tirkîya ra erşawîyenê herêmanê îşxalkerdeyan û bi nê hawayî xîret yeno kerdene ke demografîya herême bêra vurnayene. Hêrişanê dewleta tirke ra şarê ma neçare maneno ke koç bikero. Hetê bînî ra şerê Hamas-Îsraîlî zî pêlê koçberîye zêdîneno.

Vera Rojawanê Kurdîstanî zî polîtîkayê koçkerdişî ameyî caardene. Ma rixmê pêro çîyanê negatîfan zî kenê ke hetkarîya multecîyan bikerê. Ewro kampanê Serdem û Berxwedanî de xeylê koçberî est ê. Reqa de zî kampa Til Semînî est a. Herêmanê Sûrîye ra zî xeylêk koçberî verê xo danê tîya. Ma do her îmkanê xo şaranê Sûrîye de pare bikerê. Ma xîret kenê ke hewcedarîyanê şaranê Rojawanê Kurdîstanî rê bibê cewab.

Ma seba koçberan û multecîyan komîsyonêk awan kerd. La îmkanê ma werte de yê. Coka ma venga dezgehanê mîyanneteweyîyan danê ke seba peydakerdişê hewcedarîyanê multecîyan wa paştî bidê ma. Ganî hukmatê Şamî zî na babete de mesuldarîyanê xo bîyaro ca.”