Rojnamevan Necmettîn Salaz sala par di 14’ê cotmeha 2023’yan de li bajarê Silêmaniyê yê Herêma Kurdistanê jiyana xwe ji dest dabû. Komeleya Rojnamevanan a Dîcle Firatê (DFG) û Komeleya Rojnamevanên Jin a Mezopotamya (MKG) ji bo Salaz li ser gora wî ya li Goristana Akkopruyê ya Wanê bernameya bîranînê li dar xistin. Endamên DFG’ê û MKG’ê, Hevserokê DEM Partiya Wanê Veysî Dîlekçî, malbata Salaz û nûnerên rêxistinên sivîl tev li bîranînê bûn. Ji bo Salaz rêz hat girtin.
Nûnerê DFG’ê yê Wanê Adnan Bîlen di bîranînê de axivî û diyar kir ku Necmettîn Salaz jî wek her kurdekî para xwe ji zextên dewletê girt û got: “Ew kesayetek mînak bû. Kesateyek şoreşger bû. Mamoste her dem dixwest were Wanê. Lê nebû qismetê wî. Mamoste Necmettîn bi hesreta Kurdistanê û Wanê jiyana xwe ji dest da. Em ê xwedî li têkoşîn û bîranînên wî derkevin. Em carek din wî bi rêzdarî bibîr tînin.”
Birayê Salaz, Kadrî Salaz jî diyar kir ku ew ji bo vê bîranînên malovaniya Çapemeniya Azad dike û ew hemû cangoriyên Çapemeniya Azad bi rêzdarî bi bîr tîne. Kadrî Salaz ji jiyana kekê xwe hin nivîsan xwend.
Siyasetmedar Abdurrahman Dogar axivî û anî ziman ku Nemcettîn Salaz her tim di nava berxwedan û têkoşînê de bû û ji salên 80’î vir ve berxwedanek bêhempa nîşan da û jiyana wî her tim bi zilmê re rû bi rû ma. Dogar got ku roja cenazeyê hevrêyî wî Necmettîn hat Wanê jî bi zilmê re rû bi rû ma û ew ê Necmettîn nedin jibîrkirin.
Hevserokê DEM Partiya Wanê Veysî Dîlekçî jî destnîşan kir ku pergal û dewlet çawa ku ji her ramangeran ditirse ji Necmettîn Salaz jî ditirsiya û ew ê mîrateya Mûsa Anteran, Necmettîn Salazan li ser vê axê bidomînin û xwedî li têkoşîna wan derkevin.
Piştî axaftinan beşdaran qerenfîl danîn ser gora mamoste Necmettîn.
