Bedrîye Topaç
Çimanê mi ra çol herikîya
Ez êdî yew çol a.
***
Eşq mi ra şî
Ez êdî yew çol a
Çolê destanê to
Mi qum zêdîna binpîzeyê xo de
Mi qum lawna tefûdumanê xo de
Qum bî qewmê mi
Qum bî bêkesê mi
Qum bî welatê mi
Qum bî bêwelatîya mi
Mi tim koçê qumî kerd
Ez bîya budalaye
Warpay ginaya rêça qumî dima
Vîndî bîya rayîran de
Mi ancî xo dî qum de.
***
Eşq mi ra şî
Ez êdî yew çol a
Çolê çimanê to
Estbîyayîşê mi qumî de
Çinbîyayîşê mi qumî de
Wahayê mi qumî de
Teyrî qum şimenê çimanê mi ra
Awa mi qumî ra…
Her çî bi ziwanê çolî berê mi ceneno
Her çî bi ziwanê çolî beno mêmanê mi
Her çî bi ziwanê çolî xatir wazeno mi ra
Ez ancî lal
Ez ancî qum
Ez ancî çol.
***
Eşq mi ra şî
Ez êdî yew çol a
Çolê linganê to
Karwanê maran gêreno
Şew û şewdirî serê qumê mi ra
Herikîyênê leşê serdinî
Herikîyênê biaxû
Heyfê şaxê xo, xo fek de kerdo kilame
Qum lerzîyeno
Qum mireno axû ra
Dejê şahê maran mi de…
Ancî ez manena qum
Ancî ez manena çol.
***
Eşq mi ra şî
Ez êdî yew çol a
Çolê zerrîya to
Qum bî homayê mi
Ez ver de ameya secde
Mi destê xo da kitabanê qedexeyan ro
Mi sond werd bieşqî
Bieşq
Bieşq
Bieşq…
Peygamberî bî dişmenî
Ez bîya gunekara qumî
Mi xo zilut da qumî
Qirîyayîşê mi zilut
Guneyê mi zilut
Mi ancî xo qumî reyra vaftîz kerd.
***
Eşq mi ra şî
Ez êdî yew çol a
Çolê çolî
Çekdarê min o qum
Egale vile de
Kişeno
Kişeno
Kişeno
Qum beno celadê mi
Çol çol de mireno
Çol yeno dinya.
Çime: Bedrîye Topaç, Sebr, Weşanxaneyê Vateyî, Îstanbul, 2023, rr. 13-17.
