Heyana tecrîd nêwedarîyo, çîyê kî nêbeno û heme çîyî zî girêdayeyê rêxistinbîyayîşî yo. Bi serrano ke warê legalî de raye û rêbazê rêxistinî sereraşt nêbîyî. Yew hete ra dîktatorîye û faşîzmê AKP û MHPyî veranêda ke şar nefes bigîro. Nê warî de veranêda ke şar yew mîtîng û çalakîye bivirazo. No sebeb ra zî şarî mîyanî de zî yew şikîyayîş virazîya. Nê şikîyayîşî xopawitişê esasî yê Sûrî de Cizîrî de dest pêkerd û heyana ewro zî şar hema zî nêameyo xo. Tayê çalakîyê xoverdayîşî yê pîrozî est ê, muhtewaya înan sewbîna ya. Na muhtewa bi rewşa matematîkî de nêna hesabkerdiş. Ewta de muhtewaya sîyasî muhîm a. Eke ma ewta de yew nimûne bidê, Rûsya de 1905 de şorişo gird virazîya. La no şorişê 1905î sernêkewt û vinî kerd. Ewta muhtewa muhîm a, her çiqas şorişê 1905î sernêkewt muhtewaya sîyasî zaf û zaf muhîm bîye.

Xopawitişê Sûr û Cizîrî

Xopawitişo esasî yê Sûr û Cizîrî û sewbîna cayê zî eynî nawa bîyî. Eke şarê ma ewta de rêxistinî bifikrîyayêne, zerrîya şarî de şikîyayîş nêvirazîyayêne. No sebeb ra zî rewşa rêxistinî û organîzebîyayîş zaf muhîm o. Nê warî de DEM Partî seba rêxistinbîyayîşî birîyaro newe giroto. Eke ma raştî vajê, no birîyar newe nîyo. Verê coyî de zî rêbazê rêxistinî de eynî rêbazî bîyêne. La sebe rêbazê rêxistinî nêgurênayî û na zî şaş gurênayî. Bingeyê rêxistinî de şar est o û bi taybetî meclîsê taxan est o. Eke heyana ewro meclîsê taxan raşt bigurîyayêne û rêxistinbîyayîş bibîyêne, ewro rewşa rêxistinî sewbîna bîyêne.

Rêxistinbîyayîş bivirazîyo

Ganî ma bêrê raştîya xo ser û raştîya şarî zî biveynê. Nê raşteyî de rêxistinî şarî ra dûrî kewtê û şar zî rêxistinî ra dûrî kewt. Nê warî de heme çî ra ver bawerî zaf muhîm a. Bawerî bingeyê rêxistinî ya. Ganî verê verekan newe ra bawerî bivirazîyo û dimi ra rêxistinîya raşte bivirazîyo. Bawerîya ma, DEM Partî warê rêxistinî de rêxistinbîyayîşê girdî bivirazo û heme hewa ra ser bikero.

Vera tecrîdî xoverdayîş

Komployo mîyannetewî heme hewa ra domîyeno. Rayverê Şarê Kurdî bi serrano ke binê tecrîdî de yo û yew xebere nîna girotiş. Faşîzmê AKP û MHPyî seba ke saltanatê xo weş bigurêno, heme hewa ra tecrîdî mîyanî de tecrîd viraşto. Dinya zî na rewşa tecrîdî ra temaşe kena û hîrê meymunan kay kena. Ewta de çîyo ecêb est o. Persê derheqê Rayver Apoyî de vanê “xeta ma ya sûr a”. La madem kî xeta sûr a, ganî ewta de îcrat bibo. Hem rêxistinî û hem zî şar rol û mîsyonê xo kay nêkenê. Ewta de taybetî cenî û ciwanî ganî vera tecrîdî xover bidê û şarî xo dimi ra kaş kerê. Nê warî de rewşe rind nêasena. Bi serrano ke Rayver Apoyî ra yew xebere nîna girotiş û şar hema zî rewşa hewnê mergî paweno. Heyana key na rewşa hewnê mergî? Serrgêra komployê mîyannetewî de ganî şaro kurd sere wedaro, vera tecrîdî xoverdayîş û serhildanan bivirazo. Sewbîna her rewşe mergê şarê kurdî yo.