Rojnameger û nuştox Seyîd Evranî şehadetê xo yê 22yê êlula 2023yî ra verî roportajêk dabî ANFyî û derheqê têkilîyanê PDK û Tirkîya de qisey kerdbî.

Seyîd Evranî roportajê xo de bale antbî ser ke dewleta tirke seba ke Iraq PKKyî dekero lîsteya terorî awe zî sey hacetê şantajî şuxilnena.

Seyîd Evranî vist vîrî ke Mesûd Barzanîyî seba ke verê averşîyayîşê YNKyî bigêro venga Saddam Huseyînî dabî ke wa Kurdîstanî îşxal bikero. Evranî vat: “Naye ser o Saddam dekewt Başûrê Kurdîstanî. PDKyî û Barzanîyan heman serran de vera PKKyî zî dewleta tirke de hemkarîye kerdbî. Nînan 1992, 1995, 1997 de zî heman hemkarîye kerde.

Nika Musteşarê MÎTî Hakan Fîdan heman wextê îşxalê Kurdîstanî yê Osmanîyan de yeno Başûr. Tay selahîyetdaranê PDKyî zî vera ney nêrazîbîyayîşê xo mojna. PDK xora dişmenê kurdanê azadan o û keno ke Iraqî zî bianco kişta Tirkîya.

Dewleta tirke Kurdîstan de ciwanan qetil kena la Nêçîrvan Barzanî Hakan Fîdanî reyde fotografanê xo gêno. Endamanê PDKyî zî vera ney nêrazîbîyayîşê xo mojna. Yew eleqeyê PDKyî bi kurdayetîye û kurdan çin o.

Barzanîyan Kurdîstan mîyanê xo de parçe kerdo, bar kerdo. Seba ke Silêmanî (YNK) sey PDK û Barzanîyan îxanet nêkeno PDK û Tirkîya pîya dişmenîya ci kenê.

Kurdî ganî her ca de nê xayînan û nê îxanetan teşhîr bikerê. Kurdî ganî bimojnê ke hinî ê do nêrê bazarkerdene û tewirêkê qetî bimojnê. Ganî kurdî vera ney vengê xo berz bikerê.”