Înîsîyatîfê Hunermendanê Kurdan derheqê dewleta tirke û hemkarîya PDKyî ke vera Başûrê Kurdîstanî hêrişê îşxalî zêdînayî eşkerayîye daye. Hunermendo Kurd Xelîl Xemgînî ke bi nameyê Înîsîyatîfî eşkerayîye daye vat sere de şarê Başûrî ganî heme şarê kurdî vera hêrişanê îşxalî tewirê xo ramojno.

Xelîl Xemîgînî vist vîrî ke dewleta tirke ewro bi heme hêzê xo yê leşkerî, bi sîyasetî, bi dîplomasî û eynî wextî bi hemkarîya Iran, Iraq û Sûrîye vera şarê Kurdîstanî çarçewaya konseptê îmha de hêriş kena û nê vatî: “Ma sey hunermendan veng danê şarê xo yê welatperwerî, şarê xo yê kurdî û dostanê şarê kurdî; rojdemê şarê ma yo verên tecrîdê serê Rayberê Şarê Kurdî Rayber Apo yo. Sebebê heme probleman, pêkewtişan û krîzan tecrîd o. Ma tecrîdê vera Rayberîye qebul nêkenê. Ma sey hunermendanê şarê xo paştî danê hemleya vera tecrîdî. Têna eşkerayîye û şermezarkerdiş qîm nêkeno, ganî hunermendê kurdan her warî de tewrê hemle bibê.

Dewleta tirke Kurdîstan de çarçewaya îmha de verê çimanê dinya de hêrişanê qirkerdişî kena, la çew vengê xo nêvejeno. Gama ke şarê kurdî yeno qetilkerdene çewî ra veng nêvejîyeno. Ma sey hunermendanê kurdan veng danê şarê xo bitaybetî zî şarê xo yê Başûrî; hunermendê ma, roşnvîrê ma, pêşmergêyê kurdan wa nê hol bizanê ke; rîyê hemkarîya PDKyî ra dewleta tirke do Başûrî ra mevejîyo. Heta waştişê înan heta Kerkûk û Musulî şîyayîş o. Heme dinya nê zana, PDK nêzano? Rojawan û Vakur de tim qirkerdişî benê. Seba ke şarê kurdî bêro çînkerdene cepheyê îxanetî fînayo dewre. Her roje şarê ma yeno qetilkerdene. Barzanîyî paştî danê dewleta tirke. No şer do şima perûnê bivêşno. Vera nê hêrişan bêveng memanê.”