Parlamentera DEM Partî ya Sêrtî Sebahat Erdogan Saritaşe hêrişê nîjadperestî yê vera ziwan, kultur û tradîsyonê kurdan ANFyî rê ercnayî.

Saritaşe polîtîkayê şerê taybetî ercnayî û vat: “Rewşa neçareserkerdişê meseleya kurdan û şîdeto ke nê rojan de zêdîyayo çend kategorîyan de eşkenê bêrê ercnayene. Şaristananê Kurdîstanî de fuhuş, narkotîk û çîyê sey nînan zêdîyenê. Hedefê esasî cinî û ciwan ê. Kurdîstan de bi polîtîkayanê şerê taybetî waranê komelkî de fuhuş, narkotîk û ajanîye yenê vilakerdene.

Sey tecrîdî nê polîtîkayê şerê taybetî zî her cayî ra vila bîyî. Bi nê polîtîkayan ciwanî yenê vinîkerdene. Mîsalê Gulîstane Doku verê ma de yo. Seba pawitişê estbîyayîş, nasname û azadîya xo ganî ma her cayî ra zafêr kede bidê, têkoşîn bikerê. Rêxistinîye jehrkiştoxê şerê taybetî yê dewlete ya. Coka ganî ma her ca de rêxistinîya xo xurtêr bikerê.”

Saritaşe vist vîrî ke merdimê ke kurdkî qisey kenê û govende gênê tepişîyenê û vat: “Wexto ke Kurdîstan de polîtîkayêke do bêra dewrvistene na game bi game yena kerdene. Oyo ke qewimîyeno wina yo. Îqtîdar xîret keno ke şîdet her cayê komelî ra vila bikero. Îqtîdar xîret keno ke şîdet pêro waranê cuye de vila bikero. La ma wextê weçînayîşan de zî dî ke polîtîkayê îqtîdarî peynîya peynî de do bin bikewê.”

Saritaşe ard ziwan ke şar û sîyasetê kurdan xerîbê nê polîtîkayan nîyê û vat: “Ma qetî qedexeyan nêşinasnê, govenda xo bigêrê, estbîyayîşê xo bîyarê ziwan, deyîranê xo vajê û wayîrê îradeyê xo vejîyê. Çîyo ke dewlete 100 serrî yo ceribnena ancî pêşkêşê kurdan kena. La ma tim aver game eşte, apey ney.”