Malbatên girtiyan û MATUHAY-DER’ê bi boneya tecrîd bi dawî bibe û Rêberê PKK’ê Abdullah Ocalan azad bibe, li pêşiya Girtîgeha Jinan a Bakirkoy a Stenbolê çalakiya “Deng bide azadiyê” li dar xistin. Nûnerên partiyên siyasî û rêxistinên civaka sivîl jî di nav de gelek kes tev li bûn. Di çalakiyê de pankarta “Ji bo aştiya civakî û şikandina tecrîdê deng bide azadiyê” hilgirtin. Hevseroka MATUHAY-DER’ê Dîlek Sonmez Demîr di daxuyaniyê de wiha got: “Li dijî tecrîda li girtîgehan em her hefteyê çalakiya 10 deqeyan li dar dixin. Em ê îro jî li dijî tecrîdê çalakiya xwe bikin û heta ku binpêkirinên mafan bi dawî dibin jî em ê çalakiyên xwe bidomînin.
Xizmên girtiyan çalakiya xwe bi rûniştî domandin. Di çalakiyê de dirûşmên “Girtiyên siyasî rûmeta me ne”, “Zext nikarin me têk bibin”, “Bijî berxwedana zindanan”, “Rûmeta mirovahiyê dê îşkenceyê têk bibe”, “Em ê bi berxwedanê bi ser kevin”, “Jin, jiyan, azadî” û “Tecrîd sûcê li dijî mirovahiyê ye” hatin berzkirin.
