Seke yeno zanayîş heşt serrî yo şaredarîyê ke destê kurdan de yî bi zorê hukmatî destsernîyayî û bi qeyûmanê hukmatî yenî îdarekerdene. Heşt serran ra dima weçînayîşanê 31ê adara 2024î de şarê kurdî cewabê hukmatî sindoqan de dayî û heme şaredarîyê xo newe ra girewtî. Bi serkewtişê weçînayîşî şarê kurdî newe ra ameyo xo ser û bi na keyfweşîye gureyanê holan keno. Nê gureyan ra yew zî hetê Şaredarîya Peyasî ra ameyo destpêkerdene. Seba ke kesê weçînîyayî yewbînan bişinasnî mabênê Şaredarîyanê Merkezê Amedî de turnuvaya futbol û voleybolî ameya destpêkerdene.

Mîyanê kurdan de no tewir çalakî û xebatî zaf kêmî yî. Him semedê kulturê cografyaya kurdan û him zî nê vîst serranê peyênan ê desthilateyê hukmatê AKPyî de hûmarê nê xebatan hîna kêmî bîyî. Hukmatê AKPyî bi bawerîya kurdan yê misilmanan tesîrê şarî kerdo û ê gelêke hetan ra peynîya cûya moderne de verdayo. Rewşa cinîyanê kurdan hîna xirabin a. Çunkê mîyanê cûya şarî de cayê cinîyan hîna kêmî yo. Bi sayeyê şaredarîyanê DEM Partîye cinîyê kurdan zî heme cayanê cûye de xo rê ca vînenî. Cinîyan rê çalakîyê sporî sey çîyêko eyb û qedexe yeno vînayene. La şaredarîyê DEM Partîye seba ke nê fikranê xiraban orte ra wedarnê û cinîyanê kurdan heme hetanê cûye de bivînê, xebatanê winayînan kenî.

Felsefeya xizmetî

Ma armanc û semedê na turnuva Hemserekê Şaredarîya Peyasî Cengîz Dundarî ra pers kerd. Dundarî nê ercnayîşî kerdî: “Heşt serranê rejîmê qeyûman ra dima ma bi şarê xo reyra şaredarîyê xo girewtî. Semedê ma şarê xo rê xizmet berî, heme cayanê cûye de xizmet berdiş ma xo rê kerdo felsefeya cûye. Bi taybetî babetanê ziwan, kultur, huner û sporî de seba ke ma xo biresnî pêroyîya şarî, ganî ma nê babetan ser o hîna zêde vinderî û hîna vêşî bixebetî.”

‘Organîzasyonê hemparî de bêrê têhet’

Hemserek Dundarî dîyar kerd ke seba ke pêro xizmetan bîyarî ca, konsorsîyomêko hempar û lebatkerdişo kolektîf hewce keno û wina dewam kerd: “Ma zî nameyê Şaredarîya Peyasî ser o nê demê kilmî de bi taybetî faalîyetanê huner, cayanê sporî de bi yewîneyanê xo yê têkildaran reyra waştişê ameyî zî girewtî xo ser û tayê organîzasyonî xo rê kerdî hedef. Na turnuvaya ke ma mabênê şaredarîyanê xo yê merkezê Amedî de viraşta zî înan ra yew a. Bi  nê organîzasyono ke ma branşanê futbol û voleybolî de organîze kerd wa him embazê ma yê weçînîyayî yewbînan bişinasnî him zî yew organîzasyonê hemparî de bêrî têhet.”

Spor zî çalakî ya

Hemserek Cengîz Dundarî bale ante ke bi taybetî wa bêro zanayîş ke spor yew kay o û yew çalakî ya û nîya qisey kerd: “Sey serkewtişî vinîkerdiş zî yew netîceya tebîî ya. Seba ke ma na felsefe mîyanê şarî de zî bidê zanayîş, ma yew çalakîye serûber kerde. Prosesanê ney ra dima zî do çalakîyê ma yê winayênî heme şarê ma zî bigêrê xo mîyan û cayanê hîna hîrayan de kerdiş mîyanê plananê ma de bibo.”