Siftê bi vîrardena înanê ke raya nê şorişî de canê xo da, wazon nê nuşteyî de dest pê bikerî. Ewro bi hezaran dirvetinî hona Şorişê Rojava rê benê estune. Werteyê honde adirî de serva pawitena nê şorişî êyê ke meterisanê her gucikê Rojava de erzenê xo ver rê pêro pîya şarê Rojava rê serraçarnayena şorişê cenîyan bimbarek bo.

Bimbarek bo şaran rê, cenîyan rê, domanan rê, şorişgeran rê. Şorişo ke 12 serrî ra avê jê kila adirî kewt zerya şorişgeran, ewro her waxt ra jedena gunê bêro seveknayîş. Eke ewro Kurdistan de, Rojhelatê Mîyanênî de ma ke nîyadanîme, vînenîme ke her ca de îşxalkerdoxî, her ca de hukumdarî hêrişê şaran kenê, wazenê hardê qomî serva hukumdarîya xo, plananê xo dest ra bicêrê. Ewro cengode giran kî

Bakûr ra heta Başûr welatê ma de est o. Werteyê nê Lejê Dinya yê Hîreyinî de Rojava raya xeleşîyayîşî şaran rê musnena. Ciwîyayîş de senên merdene ra qeyir beno pîl yeno ramitene, şorişê cenîyan dinya rê jê model dano musnayene.

Bingeyê nê şorişî qayim o. Nê şorişî kamîye û azadîye ser ra xo ard heta roza ewroyêne. Azadîya cenîyan yena vatena azadîya homete, coka Rojava de her kar, her gurî, her game na raştîye ser ra erjîna.

Şorişê Cenîyan yê Rojava goreyê sîstemê “Neteweya Demokratîke” 12 serrî yo game bi game bîyo pîl. Roze bi roze bi xoverdayena heta roza ewroyêne hard guret. Dustê honde hêrişan de pay ra mend, şarê herême rê çeberê ciwîyayîşê têdustî rakerd.

Kurdê ke Rojava de ciwîyenê serra 2011î ra tepîya serva weşîyade azade gamade pîle este. Xo seweta şorişê şaran, şorişê cenîyan hazir kerd. Alaya şorişî Kobanê ra bîya berz. 19ê aşma hamnanî ya wertêna serra 2012î jê mîjdanîya xeleşîyayişî, jê mîjdanîya omeda serran ame dayene. Bi rayverîya kurdan Rojava de ya kî bi nameyê bînî rayverîya demokratîke de şaran xo rêxistin kerd. Sîstemê Neteweya Demokratîke serva xeleşîyayîşê şaran Rojava de esas yeno guretene. Şorişê Rojava nê bingeyî sero berz beno. Goreyê nê esasan ciwîyayîş înşa beno. Teyna serva Rojava nê, seweta herême verva jû ziwan, jû zagon, jû îtîqatî pîya werteyê aştîye de cuya şaran a têduste temsîl bena. Naca de çîyo tewr muhîm nê sîstemî de azadîya cenîyan cayê tewr muhîmî cêna. Nê sîstemî de serva dabara şarî kooperatîfî û komunî yenê ronayene, onca xoza yena seveknayene.

Şorişê Rojava şorişê cenîyan o. Roza verêne ra rayverîya cenîyan de têkoşînê ronayena şorişî ame dayene. Qezencê cenîyan hemserokîye her sazî û dezgeh de esas cêrîya.

Mavênê honde serran de her hetî ra hêrişan ser herême de dewam kerd. Binê nê hêrişan de seweta înşakerdena ciwîyayîşî bi bedelanê giranan têkoşîn hona devam keno. Serva ronayena sîstemê neweyî gurêyayîşî hona ramînê.

Zerreyê aştîye de pîyaciwîyayîşê şaran hin rehet nêno werte. Emeg wazeno, coka ewro kesê ke roza verêne ra heta roza ewroyêne seba ronayena nê sîstemî gurênê, emegêde pîlî danê. Ewro eke şorişê cenîyan, Şorişê Rojava 12 serrî yo pay ra mendo, no kî sayeyê paradîgmaya Rayverê Şarê Kurdî Abdullah Ocalanî bî.

Omede, têkoşîn û xoverdayena şarê kurdî û şorişgeranê dinya Rojava de bîyî qewet. Naye ra tepîya kî no şoriş bi nê qewetî beno pîl û pay ra maneno. Reyna hewnê serran o ke Rojava de ebi raştîya xo ya bî omeda şaran, şorişê cenîyan û Şorişê Rojava bimbarek bo.