Şaredarê Xinisî yê verênî Hasan Basrî Firato ke tornanê Şêx Seîdî ra yo û surgun de ciwîyeno, ANFyî rê derheqê tecrîdê vera Serekê PKKyî Abdullah Ocalanî de qisey kerd.

Firatî ard ziwan ke şarê kurdî giranîye dano rewşa Ocalanî û vat: “Coka dewlete nê sîstemê tecrîdî ana ca. Hîrê serrî yo ma nêeşkenê Rayber Apoyî ra xeberêke bigêrê. Dewleta tirke qanûnanê xo bi tecrîdî çin hesibnena.”

Firatî îfade kerd ke ganî rewşa Ocalanî bi hawayêkê cidîyî bêro ercnayene û vat: “Dewleta tirke meseleya kurdan sey tarîxî şexsê rayberanê kurdan de qedînaya. Dewlete hem rayberê kurdî îmha kerdî hem zî meseleya kurdan vista nê halî. Ganî şarê ma nê tarîxî ser o baldar bibo. Tecrîd berdewamîya nefretê tarîxî yê dewleta tirke yê vera rayberanê kurdan o.

Heta ke Rayber Apo azad nêbo meseleya kurdan çareser nêbena. Dewlete seba fatisnayîşê çareserîya na mesele tecrîdî ana ca. Ma sey kurdan ney qebul nêkenê. Şarê ma ganî vera tecrîdî têkoşînê xo pîlêr bikero. Heta ke Rayber Apo û Kurdistan azad nêbê ganî ma goreyê ney tewirêkî bigêrê.”