Hêzanê Kede, Aştîye û Demokrasîyî yê Stenbolî vizêr roja 35ine de Meydanê Şîşxaneyî de nobeta vera destsernayîşê Şaredarîya Colemêrgî rê dewam kerd. Çalakîkeran tîşortê bi nuşteyê ”qeyûm def be” xo rê kerdî.
Hemserekê DEM Partî yê Esenlerî Mehmet Unalî çalakîye de ard ziwan ke îqtîdaro ke qalê demokrasî û aştîye keno raştîya meseleya kurdan û îradeyê kurdan çin hesibneno.
Hemsereka DEM Partî ya Ataşehîrî Zeynep Kuloglu pare kerd ke her kes mecbur o ke verê îradeyê kurdan de hûrmet bikero.
Hemserekê DEM Partî yê Esenyurtî Abdullah Arinok û Hemserekê DEM Partî yê Beyogluyî Arîf Yilmazî zî qiseykerdişê xo de destsernayîşê Şaredarîya Colemêrgî şermezar kerd.
Aktîvîsta Têgêrayîşê Cinîyan ê Azadan (TJA) Hanim Kurume û Hemvervatoxê HDKyî yê Stenbolî Alî Balî bale ante ‘Rayraşîyayîşê Îradeyî rê Hûrmet’î ser û vat ke rayraşîyayîş bi coşî qedîyayo.
Nobete bi sloganan qedîyaye.
