“Dengbêj Tekîn Morsumbul serra 1956î de Çewlîg-Gêxî de ameyo dinya. Kalikê ci 1943 de Nazmîye ra, Dêrsim ra ameyê Gêxî. Domanîya ci Gêxî de derbaz bena. Dibistane ra tepîya wendişî caverdano. Xortanîya xo de yew traktor gêno û bi nê traktorî îdareyê xo nano ro.

1981-82 de şono bi Gimgim û uca de zewejîyeno. Çar domanê ci benê. Tîya zî îdareyê xo bi traktor, badê zî yew kamyone gêno, îdareyê xo nano ro û dewam keno. Semedê problemanê ekonomîkî ra serra 1989î de keyeyê xo bar keno şono Îzmîr. Îzmîr de heta beno teqawut, karanê cîyayan de xebitîyeno.

Hetê bînî ra seba ke vengê xo rindek o govendan û tayê cayanê bînan de kilaman vano. Eleqeyê dengbêj Tekîn Morsumbulî domanîye de dest pêkeno. O yew roportajê xo de wina vano: “O waxt Radyoyê Erîwanî est bî. Radyo keyeyê her kesî de çînê bîye. Ma belê kerdêne saate çar de, çarê şanî de, heşte şewe de programê dîna bî. Kavîs Axayî, Meryem Xanê, Xerabê Xeco, Arabo Şemo. Nameyê ke aqilê mi de, goşê mi de mendê, nînan kilamî vatêne. Henî hewesê mi bî, doman bîme. O waxt def û zurna çînê bî, estrumantalî çînê bî. Nîya gencî, kokimê ma destê jubînî gurotêne ma govende kay kerdêne. Na rey înan vatêne, ê kilamê înan mi tek-tek gurotêne. Hewesê mi uca ra ame. Yanî ez des û hîre, des û çar serrî bîya. Mekteb de vengê mi weş bî. Waxto ke dersa muzîkî bîyêne, malimî ez vetêne. Hama naye vajî Radyoyê Erîwanî mi ser o zaf tesîr kerd.”

Ziwanê dengbêj Tekîn Morsumbulî ziwanêko herêmkî yo. Fekê herêma Karerî xebitneno. Ziwanêko zelal û dewlemend o. Kilamanê Morsumbulî de hîna zêde eşq, dej, birîya welatî, cîyabîyayîş, hesret, ax û zar est o.

No dengbêjê ma yo delal di serrî verê cû bê veng û bê vaj darîya we û şî; dinyaya xo bedilnaye. Tew kesêk heşarê ci nêbî û nê zî cayê de derheqê ey de yew nuşte û xebere vejîye.”