Hemvervatoxanê Komîsyonê Kede yê DEM Partî Sevtap Akdag Karahalî û Mehmet Bozgeyîkî bi eşkerayîya nuştekîye vera hêrişê vera karkeran ê kurdan nêrazîbîyayîş mojna.
Eşkerayîye de nê ameyî vatene: “29ê hezîrane qezaya Seydikemerî ya Mugla de vera karkeran ê citkaran ê mêrdînijan hêrişo nîjadperest ame kerdene. 20-25 hêrişkaran bi kard, çuye û çeke hêrişê çar karkeran kerd. Erme, sere û qorê karkeran ameyî kutene û bi hawayêkê giranî dirbetin bîyî.

Rixmo ke karkeran gerreyê hêrişkaran kerd, heta nika hema derheqê hêrişkaran de cipersayîşêk nêdîyayo destpêkerdene. Her wext waranê cîyayan ê welatî de hêrişê winayênî benî. Nê pêro netîceya polîtîkaya hêrişkare ya îqtîdarî ya. Sîyasetê şer û şîdetî yê vera kurdan verê nê hêrişan akeno.

Ma vera polîtîka û caardişanê ke vera hêrişê vera nasnameyê kurdan akenê, bêveng nêmanenê. Îqtîdaro sîyasî ganî cade nê ziwanê xo yê dişmenîye yê vera kurdan polîtîkaya hêrişkare caverdo. Ganî cade derheqê hêrişkaran de cipersayîş bêro destpêkerdene, hêrişkarî reyna bêceza nêverdîyê û nêrê xelatkerdene.

Ma do sey DEM Partî prosesê huqûqî teqîp bikerê, vera hêrişê nîjadperestî û sîyaseto ke îqtîdar aferneno têkoşînê bi qerardarî bidomnê.”