Amadekariyên ji bo 11’emîn Mihrîcana Jinê ya Sakîne Cansiz ku dê di 30’ê Hezîranê de li bajarê Zurîchê ya Swîsreyê pêk bînin didome. Nêzî 30 sazî û înîsiyatîfên jinan piştgiriyê didin festîvalê. Civaka Demokratîk a Kurd a li Swîsreyê (CDK-S) û Yekîtiya Jinên Kurd a li Swîsreyê (YJK-S) ji bo mihrîcanê xebatê dikin. Amadekariyên teknîkî qediyaye. Li hemû bajarên Swîsreyê karên ji bo mihrîcanê didomin.

Hevseroka CDK-S’ê Dîlan Çetînkaya li ser mijarê ji ANF’ê re axivî û anî ziman ku amadekarî hemû qediya ne û got, “Weke jinên Kurd ên li Swîsreyê dimînin em li nava malan digerin û jinên Kurdistanî û dostên xwe vedixwînin festîvalê. Bi belavokên ji zimanên cuda, bi danîna standinên agahdarkirinê em hewl didin festîvalê bidin naskirin û bikin ku tevlîbûneke xurt lê bê kirin.”

Dîlan Çetînkaya diyar kir ku jinên Kurd pêşengiyê ji festîvalê re dikin lê belê gelek rêxistinên jinan ên femînîst ên Swîsreyî û partiyên siyasî jî tevlî festîvalê dibin.

Dîlan Çetînkaya wiha axivî: “Di 30’ê Hezîranê de roja Yekşemê em li benda gelê xwe ne ku bi rengên xwe yên Kurdistanî tevlî festîvalê bibe. Bi kinc, xwarin û çanda xwe em ê li qadê bin.”

Karê festîvalê dewam dike

Aktîvîsta YJK-S’ê Hatîce Kandal jî bal kişand ser karên ji bo festîvalê yên li Cenevreyê û got, “Li her derê otobus hatine amadekirin. Ji qada Cenevreyê jî otobus amade ye. Em ê roja Yekşemê tevî gelê xwe li qada festîvalê bin.

Endama Dîwana Hevserokatiyê ya CDK-S’ê Tûba Yilmaz jî anî ziman ku ji bo festîvalê ew serdana malan dikin û mirovan vedixwînin festîvalê.

Ji Kantoan Valaîsê Berdevka Meclîsa Jinên Kurd Dîlan Pinar jî ragihand ku bi serdana malbatan ew jinan vedixwînin festîvalê û got, “Li qada me jî wesayit hatiye amadekirin. Em ê bi xurtî tevlî festîvalê bibin.

Endama meclîsa Jinê ya Lajîn a Lozanê Bahar Yeşîlyûrt jî diyar kir ku tevî malan wan serdana kampên penaberan kirine û jin vexwendine festîvalê.