Şewatê mabenê qezaya Şemrexî ya Mêrdînî û qezaya Çinarî ya Amedî de 15 kesan dinyaya xo bedilnaye û bi desan kesî dirbetin bîyî. Goreyê Wezîrîya Zîret û Daristanî 924 heywanî merdî û 14 hezar û 900 hektar war vêşa bî wele. Vera şewatî yo ke dewlete şar bi hawayêkê eşkera qederê ci rê caverda, nêrazîbîyayîşî hema dewam kenê.

Dewa Heberê ra Ferhan Erdema ke merdimê ci şewat de merdî, ANFyî rê qisey kerd. Erdeme nê vatî: “Bi serran o nê dewan de problemê ceyranî est ê. Ceyranê ma tim birîyeno. Seba ke tim ceyran şino û yeno, malzemeyê ma yê ceyraninî xeripîyenê. A roje serê sibayî ceyran birîya û heta şewe çînêbî. Dima ceyran veradîya û cade dewa ke kişta ma de ya tede şewat vejîya. Şirîtanê ceyranî yê dewe de çîkî perayî û ê çîkî bîyî sebebê şewatî. Dima ra zereyê 10 deqan de şewat resa dewa ma. Kesê ke semedê hewnakerdişê şewatî şîyî, înan ra yewî dînyaya xo bedilnaye. DEDAŞî ma perîşan kerdî, banê ma vêşnayî. Nika kam hesabê nê dano? Kam vano sûcê min o? No zî qîm nêkeno ma sûcdar kenê.

Eke ma kurd nêbîyêne wina nêkerdênê. Ma mergî rê caverdenê. Ne qiymetê ganê tutanê ma ne zî qiymetê heywananê ma est o. Vaşo ke herre de yo qiymetê ey zî çîn o. Merdimê ma merdî. Bi desan heywanê ma merdî, keda ma ya emserrî betal bîye. Na felakete ra pîle felakete est a? Ma hinî çi bicîwîyê? Merdimê ma verê çimanê ma de vêşayî. Dewê ma vêşayî. Adir kewt keyeyanê ma. Eke dewlete yew helîkopter bişawitêne, ê şewatî heta serê sibayî dewam nêkerdêne. Eke helîkopter bîameyêne hende merdimî nêmerdêne. Helîkopterî nêameyî, îtfaîya erey ameye, gama ke ameyî zî nêeşkayî warê darîstanî rê mudaxale bikerê. Êyê ke şîyî kam do înan pêyser bîyaro?”

Dewa Kelekê ra Emîne Esene zî nê vatî: “Gama ke şewat vejîya, ma cade veng da îtfaîya. Şaredarîya qeza ra îtfaîya ameye la leşkeran destûr nêda bikewo dewe. Ma bi saetan pawit, 10 kesan dinyaya xo bedilnaye, la îtfaîya cor de dîyaye pawitene. Ma cehd kerd ke bi xo şewatî bikero hewna, ma kerd ke birîndaranê xo bixelisnê. Çar kesan seba ke waşt dirbetinan bixelisnê dinyaya xo bedilnaye. Ne merdimî mendî, ne heywanî ne zî karitişê ma. Yew şewe de cuyeya ma serûbin bîye. Ma çî ciwîyayî, se bî nêzana. Qederê kurdan no yo. Bêterî tim ma vînenî. Şewat de zî seba ke ma kurd ê, çew wayîrê ma nêvejîya. Nêweşxane de hema nêweşî est ê. Rewşa tayînan giran a. Tutê qijkekî bêdadî bêbabî mendî, ciwanê ma şîyî. Kam do hesabê ci bido?”