Vera destsernayîşê Şaredarîya Colemêrgî Amed, Riha, Sêrt û Mersin de vizêr zî çalakîyê nobete ameyî kerdene.

Şaredarîya Bajarê Pîlî ya Amedî û şaredarîyanê 13 qezayanê ci de nobete roja 14ine de dewam kerde. Xeylêk kesî tewrê nobetan bîyî û vera destsernayîşî wayîrê îradeyê xo vejîyayî. Qiseykerdişan de ame vatene ke şaredarîyî yê şarî yê û şar do îradeyê xo teslîmê destê qeyûman mekero.

Nobeta Pasûrî de dengbejan deyîrî vatî. Nobeta Rezanî de Denîz Poyraze ameye yadkerdene û ame vatene ke hêrişê vera Poyraze hêrişê vera kurdan, vera kesanê ke cîya fikrîyenê, bawerîyanê cîyayan û kesanê ke seyyewbînîye wanenê ame kerdene.

Verê Şaredarîya Akdenîzî ya Mersînî de nobeta vera destsernayîşê Şaredarîya Colemêrgî vizêr zî dewam kerd. Hemşaredarê Akdenîzî Nurîye Aslan û Hoşyar Sariyildiz û Parlamenterê DEM Partî Alî Bozan zî tede xeylêk kesî tewrê nobete bîyî. Çalakîye de pankarta “Qeyûm vera îradeyê şarî xespkerdiş o. Darbeya vera demokrasîyî yo” ameye akerdene.

Çalakîye de Denîz Poyraza ke 17ê hezîrana 2021î de hêrişê vera bînaya HDPyî ya Îzmîrî de amebî qetilkerdene ameye yadkerdene. Çalakîye de dowîzê “Hemra Denîze bêmerg a” ameyî akerdene û sloganê “Jin, Jiyan, Azadî” ameyî vatene.

Hemsereka DEM Partî ya Mersînî Bedrîye Kuşe da zanayene ke faîlê Denîz Poyraze îqtîdarê AKP-MHPyî bi xo yo û vat: “Ma kiştoxan şinasnenê, hesab persenê.”

Reyna Sêrt û Riha de nobetanê vera destsernayîşê Şaredarîya Colemêrgî vera polîtîkayanê hêrişkaran mesajê xurtkerdişê têkoşînî ame dayene.