Hemşaredarê Colemêrgî Mehmet Siddik Akiş bi destê dewleta mafya bi zorbazîye wezîfe ra gêrîya, bi hawayêkê lezî ame muhakemekerdene û ci rê 19 serrî 6 mengî ceza dîyaye. Herinda ey de Walîyê Hakkarî Alî Çelîko xespker ame tayînkerdene. Dewleta Erdoganî seba ke çalakîyanê şarî asteng bikero, xeylêk polîs û leşkerî şirawitî ver bi Colemêrg. Bi kilmî Kurdistan de vera îradeyê şarî reyna “derbe” virazîyaye.
Hemşaredar Mehmet Siddik Akişî rê mehkeme de vajîya ke “rêxistina terorîste ya çekdare îdare keno”. Eke ewro rêxistina terorîste est a, o zî rejîmê Erdoganî yo dizd o. Her dezgehê dewlete binê destê ey de yo. Çend serrî yo dizdîye keno, bêrayîrîye keno û keda şarî weno, tu dozgerêk wetnêano ke ey û cerganê ey muhakeme bikero. Polîs, dozger, leşker, pawitox, pêro nê merdimê çekdarî asayîşê îqtîdarî peyda kenê. Rejîmê seraye hem keda şarî weno hem zî tersneno. Seba ke estbîyayîşê xo bidomno, vera şarî şîdet şuxilneno û mîyanê şaran de dişmenîye aferneno. Na çarçewa de merdim eşkeno vajo ke rejîmê seraye êdî “rêxistina terorîst a”. Senî ke Fethullah Gulenî dezgehê dewlete girewtî binê bandora xo, Erdoganî zî metodê ey gurêna. Senî hukmatê Erdoganî rêxistina Gulenî sey terorîst hesibneno û sey “FETO” pênas keno, demê ameyoxî de rêxistina Erdoganî zî do sey terorîst bêro hesibnayene û sey “ETO” bêro pênaskerdene.
Huqûq û monarşî
Erdoganî eşkerayîye kerde ke qaso ke hukmê tirkan “huqûq” ardo ca. Huqûqê Erdoganî maneno maro ke têna înanê ke ningê ci rut ê gaj keno. Qanûnê Erdoganî manenê qanûnanê Hammûrabî. Hişê ey de “monarşî” est o. Wazeno ke komel ci rê hertim “girêdaye” bibo. Huqûqo ke Erdogan qala ci keno vera kurdan xeylêk “dafikan” teşmîl keno. Meseleya Mehmet Siddik Akişî de na rewşe bi zelalî eşkera bîye. Heta weçînayîşan mehkemeyanê Erdoganî hişmendane bire nêdaye, gama ke merdim beşdarê prosesê şaredarîye bî, dafike zî dest pêkerd. Heyetê Weçînayîşî yê Berzî (YK) na dafike de rolê xo zaf “baş” kay kerd. Gama ke Hemşaredar Akişî beşdarîya xo kerde, ci rê tesdîqo fermî dîya. Yanî hukmê tirkan “huqûq” ard ca. Badê ke Akişî dest pê wezîfeyê xo kerd, seraye û hukmî dafike amade kerde. Xo ra bingeyê dewleta tirkan sextekarîyan ser o ameyo awankerdene.
Planêko kolonyalîst
Cergê Erdoganî baxusus şaristananê sey Colemêrg û Şirnexî sero polîtîkaya taybete anê ca. Çike îşxalkerî dewlete îdare kenê. Seke yeno zanayene “kolonîzatorî” a herême de neft vejenê. Mîsal Şirnex de nika rojêke de 40-50 varîl neft vejîno. Xo ra Wezîrê Çimeyanê Xozayî û Enerjî Alparslan Bayraktarî verê cû vatbî ke ê do Şirnex, Colemêrg û Wan de hûmara bîranê neftî bizêdnê. Polîtîkaya qeyûmî de “kolonyalîzm” nimite yo. Şirnex de zî demê weçînayîşan de her tewr bêusûlîye virazîyaye. Kedewerdoxî wazenê ke kes înan asteng nêkero û bi azadî keda Kurdistanî biwerê. Eke cayêkî de sentralîzasyon qewimîyeno, uca de bêguman “serokerdoxîye” û “kolonîzekerdoxîye” est ê. Rejîm çiqas ke merkezwaz beno, hende “sucanê” xo nimino. Ewro Tirkîya û Kurdistan de hêzo ke maskeyê dewleta mafya bieşko wedarno, têna têgêrayîşê kurdan o. Coka Erdogan û murîdê ci hêrişê vera kurdan kenê û şaredarîyan dest ra gênê. Ê plan kenê ke pêro Kurdistanî biaçarnê “qeyûmistan”.
