Xeylê waxt o serê medyaya cematkî de huner û kulturê kurdî don naskerdene. Taybetî ra hunerê muzîkê kurdî. Bêguman kêmîye zaf a, çunkê no karê mi nîyo. Karê hunermendanê muzîkê kurdan o. Çunkê muzîk karê înan o. No waxt de mi fam kerd ke şarê ma kulturê xo zaf senik nas keno.
O kulturê kurdî yo ke hebê nas keno, o kî zey populer kulturî nas keno. Bêguman no tenya sucê şarî nîyo, xeleta hunermendo kî zaf têde est a. Hunermendanê ma têtivanê welatê xo kolonîyalîsto dest ra xelesno, sîstemê starî de zey hunermendonê kolonîyalîsto hereket kenê.
Bêguman semedê pêro hunermendo nêvame, hunermendê ma yê ke hunerê başî kenê kî est ê. Labelê, no bes nîyo. “Amancê hunerî asayîyena teberê estbîyayîşê nîşandayene nîyo, muhîmîya ke zerrê înan de temsîlkerden a” Arîstoteles. Yanî hunermend çi ke zerrê şarî de est o keno eşkera, yan zî çîyo ke zerrê şarî de têmnayî yo vezeno teber û musneno şarî.
Tayê hunerî est ê ke zaf şîkînê ra yewbînî, nî hunero ra şîîre û muzîk pêrono ra zaf şîkînê ra yewbînî. Şîîre çîn bo, muzîk de qese nêbeno, muzîk kî çîn bo qese zey muzîkî îsanî rê weş nêna. Yanî şîîre muzîkî miqet kena, muzîk kî şîîre miqet keno. Şîîre zerrê cuya şarî ra êna, muzîkê qese zerrê şarî ra êno û înan rê beno veng.
Muzîkê şîîre û şar pîya benê reng û ahengê yewbînî. Hunermend kî nî hunerî vezeno worte û nîşan dano şarî reyna. Tîya de çîyo tewr muhîm karê hunermendî yo. Hunermendî ke no karê xo baş nêkerd, şar nata bota zey têla vasîya ke kuna vera vayî pîşkîno her ca, tê kîşte de nêbeno, ne reng maneno ne aheng. Hunerê hunermendanê ma baş o, la ganî nî hunermendî tayê gurêyan de bêrê pêser û orkestrayono girdo virazê.
Şarê ke zaf veng ra muzîkê xo çîn o, serê dinya de vila benê. Nî zaf vengî pêro pîya ebê muzîkê xo ra serba pêserbîyayena şarî veng danê. Hunermendî goş şarî serne rê, tayê gencê ma şîîro nusenê û rusnenê hunermendo.
La hunermendî ne baş ne xirab cewab nêdanê şarî, tîya de beşdarbîyayena hunermendî û şarî destê hunermendî ra vişîna. Felsefe de vateyo nîyanên est o: “Eke ti wendoxan nêresnena, ti fîlozof nîya”. Yanî hunermend ke xo dima hunermendonê newîyo nêresneno hunermend nîyo.
Rojava semedê hunerî zaf nimûneya baş a. Key ke şerî dest pêkerd, ey ra nat hunerî sero kî zaf çîyê başî ardî meydan. Çunkê uca de tenya yew dide kesî nêdanê poştdayîş, pêro pîya tê kîşte de huner virazenê. Gumanê mi est o ke yew roze hunermendê çar qoşeyê Kurdistanî pêro pîya ênê tê kîşte, hunero ke ma înan ra pawenîme, zerrê şarê ma ra vezenê teber û nîşan danê dinya.