Nurhayat Altune serra 2014î de Partîya Demokratîke ya Şaran (HDP) ra bîbî Hemşaredara Dêrsimî. 17ê teşrîna peyêna 2016î de qeyûm amebî tayînkerdene û Altune dimayê tayînkerdişê qeyûmî tepişîyabî. Altune 15ê gulane de badê 7 serre û nême Zîndanê Kocaelîyî ra serbest ameye veradayîş. Aye derheqê tedaya zîndanan, tecrîd û dewaya Kobanê de qisey kerd.

Altune qiseykerdişê xo yê verênî de bale ante serê qewimîyayîşê 2016î û wina vat: “Ma bi operasyonêk ameyî tepiştiş. Qeyûmî tayînê şaredarîyan bîyê. Netîceya qerarêkê sîyasî de ma ameyî tepiştiş. O wext ma dormeyê 102 şaredarîyî girewtbî. Hukmatê bîyayî ma sey hêz dîyî û aciz bî. Netîceya na rewşe de ma ameyî tepiştiş. Ma berdê zîndanê dîyarkerdeyan. Semedê ma zîndanî ameyî weçînayîş û înan ra yew zî Kandira bî. Sewbîna Edîrne, Sîncan est bî. Cayê zaf dûrî ke bieşkê ma îzole bikerê û manewîyatî ra dûrî bifînî ameyî weçînayîş. Dima ra îfadeyanê xo de zî vatî ke ma tîya seba şima hadre kerd, personel daxî semedê şima ameyî girewtiş. Her tewir lazimîyan asteng kenê. Nizdîyê 3 aşmî nizdîbîyayîşêko winasî est bî. La ma zanayêne û ma raşteyê têkoşînî nêterikna. Donem donem operasyonê winasî virazîyenê û serra 2016î de vera ma virazîya. Ganî merdim zîndanan baş bizano û fehm bikero. Zîndanê ke temamî merdiman îzole kenê ameyî viraştiş.”

Altune dewamê qiseykerdişê xo de qala grevê vêşanîye û tepişteyanê nêweşîyan kerd û wina ercna: “Embazê ma nika grev de yî. Nêvejîyenê pêvînayîş û 4ê nîsane ra nata domnenê. Zîndano ke ez tede bîya de ma rewşa teberî nêzanayêne. Na babete de ez wazena vengdayîşêk bikera ke tepişteyan tena nêverdî. No têkoşîn têkoşînêko şexsî nîyo. Têkoşînê azadî, aştî û bîyayîşî yo. Senî ke teber de seba azadîye têkoşîn yeno dayîş, zîndan de zî seba eynî çîyî têkoşîn yeno dayîş. Mi gore vengê tepişteyan, zîndanan baş nîno eşnawitiş. Na babete babetêka hesas a. Ganî merdim bi cîdîyet serê na babete de vindero. Tepişteyî her game binê denetîmî de yî û merdim nêzano çi beno û çi yeno sereyê merdimî. Xeylê tepişteyê nêweşî zî est ê. Tepişteyê ke nêeşkenê biewnê xo est ê. Xeylê tepişteyê ke emrê ci zêde yo, est ê. Ganî merdim înan reyde eleqedar bibo. Nêeşkenê lazimîyanê xo bîyarê ca. Zîndan de merdim nêeşkeno xo biresno çîyo ke wazeno. Ge-ge tengkerdiş û ge-ge zî sistkerdiş virazîyeno. La ma vera nê caardişan de zanayêne ke nê gamê polîtîkî yê. Ma raşteyê azadîye ke viraştbî de ciwîyayêne.”

Altune tewr peynî bale ante serê dewaya Kobanê û qeraro ke ame dayîş û wina qisey kerd: “Dewaya Kobanê kumpas a. Ma sere ra wina vanî. Embazê ma yê ke têkoşînê azadîye danî bi dewaya kumpasî ameyî tepiştiş. Seke sucê zaf pîlî kerdê nizdîyê înan bîyî. Azadîya xo ra bîyî. Ma qet qebul nêkerd û ma nêkenê zî. Kesê ke ewja de yenê muhakemekerdiş sucdar nîyê. Sucêk nêkerd. Na dewa de qismêk serbest ame verdayîş û qismêk zî tepişîya. Polîtîkayêka xofin a. Ma qerarêkê winasî tesilî qebul nêkenê. Na dewa nîya, heyfgirewtiş o. Sucê prosesî erzîya serê embazanê ma. Ma dewayêka winasî û qerarêkê winasî qebul nêkenê. Bi nê qerarî peyame dîyena heme şarî. Cezaya zaf berza ke dîyaye Fîgen Yuksekdage çîyêko normal nîyo. Ez bi Fîgene reyde eynî zîndan de menda. Têkoşînê Fîgene yo şorişger, nizdîbîyayîşê Fîgene yo vera qerarî qet nîno munaqaşakerdiş. Ez bawer kena ke bi hêzdarî do nizdîyê qerarî biba. Ma kişta Fîgene de ca gênê. Neheqî û bêhuqûqîyêka pîl a. Ma timî bi way û biratîya şaran, yewîye ra bawer kenê.”