Aşma gulane bêguman qezaya Farqînî ya Amedî de wayîrê cayêkê girîngî ya. Farqînijî wina vanê: “Gulane veyveka serre ya, Farqîn zerrîya her kesî de cayêk o.” Her serre şarê Farqînî 14ê gulane de roşanêk fîraz keno. Nameyê ci kurmancî de “Serê Gulanê” yo. Nê roşanî de şar şino seyrangehan, pîknîkan keno, govendan gêno û deyîran vano. Her cayê Farqînî de coş û kelecan virazîyeno. Emser zî coşê roşanî xeylê berz o. Yeno zanayene ke Farqîn de weçînayîşê herêmî ra dima DEM Partî serkewte bîye. Şaredarîye destê qeyûmî ra apey gêrîyaye. Nika hemşaredarî Sevîm Bîçîcî û Kadrî Esen şaredarîye îdare kenê. Hemşaredarê Şaredarîya Farqînî Kadrî Esenî derheqê girîngîya Serê Gulanê de rojnameyê ma rê tayê ercnayîşî kerdî.

Hemşaredarê Farqînî Kadrî Esenî ard ziwan ke no roşan têna 14ê gulane de Farqîn de yeno pîroz kerdene û wina vat: “Tarîxê nê roşanî xeylê kan o. Yeno vatene ke reyaya nê roşanî heta deme Merwanîyan şina. No roşan yeno manaya pêşwazîkerdiş û pîrozkerdişê wusarî. Ez domanîya xo ra nata beşdarê pîrozkerdişê nê roşanî bena. No roşan bi rastî roşanê Remezan û Qurbanî ra ber sey roşanê hîrêyinî yeno pîroz kerdene. Her kes serê sibayî keye ra vejîyeno teber û şino hetê çimeyan. Serê Gulanê Kurdistan de tena Farqîn de yeno pîrozkerdene. Rojêka taybet a.”

Şayîyî û deyîrî

Esenî dewamê qiseykerdişê xo de wina vat: “Şar şewe ra werd virazeno û beno seyrangehan. Tay kesî zî keye de werd nêvirazenê, şinê cayê seyrangehî de virazenê. 14ê gulane sey roşanê 3. yeno pêşwazîkerdene. Şar na roje de şino qeraxê çem û newalan. Heta şewe ewja de şayîye yena viraştene û deyîrî yenê vatene. Verê cû hunermendê farqînijî est bî û seyrangehan de nê hunermendan deyîrî vatêne. Ge-ge festîvala na roje zî ameyêne viraştene. Nika ma zî sey şaredarîya Farqînî bi şîyayîşê sîstemê qeyûman, do 14ê gulane biaçarnê rojanê verênanê ke 6-7 serrî verî senî ameyêne pîrozkerdene.”

Amadekarîyê şaredarîye

Hemşaredar Esenî bale ante amadekarîyan ser û venga tewrbîyayîşê seyrangehan kerd. Ey wina qisey kerd: “Sey şaredarî ma yew hewteyo ke dest pê amadekarîya Serê Gulanê kerdo. Yew koma erbaneyî do 14ê gulane de bêra Farqîn. Ma do pîya şêrê seyrangehan ke farqînijî şinê nê cayan. Tewr zêde şar seyrangehê Parka TOKÎ, Parka Kanîya Navîn û Zîyaretê Zîvetirkê de kom beno. Semedo ke zafane farqînijî nê cayan de kom benê, ma do zî sey hemşaredar û ekîbê erbaneyî şêrê nê cayan. Ma do nê cayan de şarî zîyaret bikerê. Do raşteyê ziwan zî ma reyde bibo. Ma do seyrangehê 14ê gulane û 15ê Gulane Roja Ziwanê Kurdî girê bidê yewbînan. Do bernameyê ziwanî zî bibê. Xebatê kulturî do tewrê raşteyê ziwanî û xebatanê şaredarîye bibê. Ma bi rayîrê rojnameyê şima venga tewrbîyayîşî kenê. Ekîbê ma yê pakîye û ekîbê ma yê karê fenî amadekarîyan kenê. Cayê seyrangehî de amadekarîyî yenê kerdene û farqînijî paweyê 14ê gulane yê.”