Dardekerdişê Denîz Gezmîş, Huseyîn Înan û Yûsûf Aslanî sero 52 serrî derbas bîyî. Hema zî no qerar bi şîdet yeno nîqaşkerdene. Armancê şorişgêran hertim eşkera yo. Ê wazenê komel hîna baş biciwîyo. Ê wazenê problemê sinifkî nêbê. Eke hêga berhem nêdano, ganî o bi traktorî newe ra bêro ramitene. Pergalê komelî zî nîya yo. Eke pergalêk komelî mirozin keno, ganî o pergal bêro rijnayene. Reformkerdiş qîm nêkeno. Seke Rosa Luksemburge verê cû nuştbî reformîzm dêsêkî bi girmikan a rijnayîş o. Yanî xîretê Sîsîfosî yo. Faşîzm bi têkoşînê aştîyane nêrijîyeno. Denîz Gezmîş û embazê ci zî hişmend bîyî. Înan zanayêne ke Tirkîya de pergalêko komprador û kedewerdox est o. No pergal bi reforman nêbedilîyeno. Coka înan qerarê têkoşînê çekdarî dabî. Na çarçewa de serra 1970î de Anqara de Artêşa Xelasîya Şarî ya Tirkîya ronîyaye. Na rêxistine xeylê tesîrdar bîye. Ma vajê çele 1971 de Anqara de bankayêke ameye serokerdene.

Dewleta tirke bêguman vera THKOyî tedayê xo zêdînayî. Derheqê Gezmîş û embazanê ci de bira tepiştişî dîyaye. No dem 12yê adara 1971î de derbeyêke zî qewimîyaye. Xora yeno zanayene ke na derbe hemverê tevgeranê şorişgêran ameye serûberkerdene. Derbe ra 4 rojî ra pey Denîz Gezmîş û Yûsûf Aslan qezaya Gemerekî ya Sêwasî de ameyî destbendkerdene. Bado Huseyîn Înan zî Kayserî de ame destbendkerdene.

Qerarê dardekerdişî

Derheqê înan de muhakemekerdiş bî. Netîce de goreyê maddeya 146. ya Qanûnê Ceza yê Tirkan cezaya dardekerdişî dîyaye înan. Bado meclîsê tirkan de raydayîş qewimîya û bi zafêrîya rayan ceza ameye tesdîqkerdene. Dima ra 6ê gulana 1972yî de hîrê şorişgêrê bêmergî xedarane ameyî dardekerdene. Denîz Gezmîşî roja dardekerdişî de babîyê xo rê mektubêka hîsdare şirawite. Mektube de qerardarîyêka bêhempa est a. Heme mektube nîya ya:

Mektuba Denîz Gezmîşî

“Gama ke mektube resena destê şima, ez do bimirî. Çiqas ke ez vajî şima xem mekerê, şima do oncîna xem bikerê. Labelê ez wazena ke şima na rewşe bi pêtîye pêşwazî bikerê. Merdimî maya xo ra benê, pîl benê, ciwîyenê û peynîye de mirenê. La çîyêko muhîm zêde ciwîyayîş nîyo, cuye de zaf çî kerdiş o. Coka ez rew ra bedilnayîşê dinya normal hesibnena. Yew zî embazê min ê ke mi ra ver şîyî heqîya xo, caro vera mergî tede nêmendî. Qet şik mekerê ke ez zî do vera mergî tede memanî. Lajê şima vera mergî bêzar û neçar nîyo. O hişmendane dekewt nê rayîrî û zanayêne ke peynîya ci na ya. Fikrê mi bi şima cîya yê, la ez texmîn kena ke şima do mi fam bikerê. Têna şima nê, ez bawer kena ke şarê tirk û kurdîyê ke Tirkîya de ciwîyenê do fam bikerê. Mi seba cenazaya xo avûkatanê xo rê talîmatî dayî. Yew zî ez do dozgerî hayîdar bikerî. Ez wazena kîşta Taylan Ozguro ke Anqara de serra 1969î de dinyaya xo bedilnaye de bêrî binerdkerdene. Nê semedî ra cenazaya mi meberê Stenbol. Teselîkerdişê maya mi êdî wezîfeyê şima yo. Kitabanê xo birayê xo yê qijî rê veradana. Ci rê bi taybetî vajê ke ez wazena o merdimê zanistî bibo. Wa zanistî reyde eleqedar bibo. Wa o xo vîr ra nêkero ke zanistî reyde eleqedarbîyayîş seba merdimîye xizmetêk o. Peynîye de ez çîyêko ke mi kerdo ra caro poşman nîya. Ez to, maya xo, birayê min ê pîlî û birayê xo yê qijî bi adirê şorişgêrîya xo gêna verara xo.”