Endamê KNKyî Refîk Gefurî ard ziwan ke PDK îşxalê dewleta tirke asan keno û pêro destkewteyanê şarê kurdî erzeno mîyanê tehlukeyî.

Refîk Gefurî vist vîrî ke dewleta tirke ya îşxalkere seba ke verê gerîlayan de bin kewta gêrena rayîranê cîyayan. Gefurî vat: “Dewleta tirke çend mengî yo tim zîyaretê Iraqî kena ke ey tewra şerî bikera. Hukmatê Herêma Kurdistanî xora binê kontrolê dewleta tirke de ya. Hukmatê Herêma Kurdistanî herinda vervejîyayîşê îşxalî de îşxalî asan keno û destek dano îşxalkeran. Hukmat destekê lojîstîkî dano dewleta tirke, îşxalî asan keno û tedaya Iraqî zî keno ke wa destek bido îşxalê tirkan. Nika hukmatê Kurdistanî bire daye ke seba ke petrolî bero Ceyhanî rayîrêkê neweyî înşa bikero.”

Gefurî da zanayene ke sey KNKyî rojdemê înan o esas îşxalê dewleta tirke yo û vat: “Hukmatê Erdoganî amadekarîya hêrişanê neweyan keno. Coka rojdemê ma yo esas îşxalê tirkan o. Destkewteyê ke bi bedelanê pîlan ê ewladanê kurdan visîyabî destî, yenê çinkerdene. Ganî şar û hêzê Kurdistanî na raştîye bizanê ke bi hetkarîya hukmatê Iraqî peynîya Başûrî yena ardene. Iraqî her çi destê Başûrî ra girewto. 

Eke dewleta tirke ancî hêriş bikera erdê Başûrî zî do destê ma ra şoro. Dewleta tirke teyna armanc kena ke destkewteyanê kurdan çin bikera. Dewleta tirke bi bahaneya PKKyî hêriş kena la gerîlayî şorê ekonomî do raşt biba? Wa şarê ma bi propagandayanê winayênan mexapîyo.”