Sîyasetmedar Mehmet Çakaso ke Almanya de tepişte yo vat ke îdîanameyê ey de eslê xo de têgêrayîşê kurdan yeno sûcdarkerdene.

Sîyasetmedaro kurd û Mehmet Çakas serrêke ra nata şaristanê Hannoverî yê Almanya de tepişte yo. Roniştişo peyên ê dewaya vera Çakasî 3yê nîsane de Mehkemeya Eyaletê Berzî ya Celle de ame kerdene. Çakasî mehkeme de pawitişê xo yê bi 43 rîpelî pêşkêş kerd.

Mehmet Çakaso ke Çewlîgî ra yo xebatanê xo yê sîyasîyan ra bi waştişê Almanya Îtalya de kanûna 2022yî de tepişîyabî û dima adara 2023yî de  teslîmê Almanya amebî kerdene. Çakas madeyê 129/byî ra yeno muhakemekerdene.

Çakasî da zanayene ke 6 serran o Almanya de mendo, ey qetî çîyêko îlegal nêkerdo la rixmê ney zî bi ‘terorîzmî’ yeno sûcdarkerdene û vat: “Îdîaname seba ke Têgêrayîşê Azadîye yê Kurdan sey sûcdaran hesibneno ma zî wina mojneno. La raştîye wina nîya. Şarê kurdî şarêko mezlûm o, mexdûr û bêsûc o.

Têgêrayîşê Kurdan hetê ehleqî û huqûqî ra nê, rîyê sebebanê ekonomîk-polîtîkan ra sey ‘têrorî’ yeno pênaskerdene. Coka sey bi mîlyonan kurdan ê mesûman ez zî pê ‘terorî’ yena sûcdarkerdene. Nê semedî ra seba ke ez xo bipawî, ganî ez şarê xo û heqê xo pawitişê şarê xo yo ke estbîyayîşê ci bi seserran o yeno muneqeşekerdene, bipawî. Xora eslê xo de problemê muhakemekerdişê mî zî tam nê ra yo: Merdim bieşko xo bipawo ya zî meeşko xo bipawo.

Meseleya kurdan meseleya netewebîyayîşî ra zêdeyêr meseleya netewenêbîyayîşî ya. Sebebê na mesele zî a ya ke kurdî wayîrê statuyêkê sîyasîyî nîyê û Rojhelatê Mîyanênî de erdê kurdan nêdîyeno înan. Meseleya kurdan meseleyêka seserre ya.”