Namzedê Hemşaredarîya Peyasî Cengîz Dundarî ard ziwan ke rejîmê qeyumî pêro ercê şarê kurdî xeripnayî û vat ke ê do rayberîya herêmî ya beşdarvan, demokratîk û azadîwaze awan bikerê.

Hûmara nufusî ya tewr peyêne de eşkera bî ke qezaya Peyasî (Kayapinar) ya Amedî babeta nufusî de qezaya tewr gird a. Nika qezaya Peyasî de problemê serekeyî koçkerdiş, bînayê bi xisar û bajarvanîya çewte ya. DEM Partî seba weçînayişê 2024î namzedê xo bi rayîrê verweçînayişî dîyar kerdî. Verweçînayişê Peyasî de Cengîz Dundar yewin vejîya û bî namzedê Hemşaredarîya Peyasî. Dundarî weçînayîş û rewşa qezaya Peyasî ya peyêne ser o tayê ercnayîşî kerdî.

Dundarî derheqê pergalê hemserekîye de wina vat: “Bingeyê pergalê hemserekîye de seyyewbînanî est a. Heme waran de zî no nêzdîbîyayîş esas o. Tewr muhîm zî problemanê komelî rê nêzdîbîyayişêko esasî, bitaybetî yê cinîyan rê est o. Çimkî nê pergalî de çareserî tewr muhîm a. Xususî nê pergalî de verba zîhnîyetê mêrdeyî şerêk zî est o, yanî mesele tena yew palkursî mabênê cinî û mêrdeyî de barkerdiş nîyo.”

Namzedê Şaredarîye Dundarî bale ante xizmet û awankerdişê personelî ser û wina qisey kerd: “Ma çiqas bivajê zî rolê rayberîya herêmî yo fermî est o. Her kes zaneno hukmato nikayin welatê Tirkîya senî îdare keno. Xususî her kes baldar bibo ke şaredarîyanê bînan de personel û xebatkaran rê senî yew nêzdîbîyayîş est o, şaredarîyanê ma yê ke tede qeyumî est ê de senî yew nêzdîbîyayîş est o. Şaredarîyanê ma yê ke tede qeyumî ameyê tayînkerdene de şaxanê stratejîkî rê xebatkarê bêwesf, bêzanayîş û bêlîyaqat ameyê tayînkerdiş.

Temsîlîyetê seyyewbînanîye

Ma do verba nê nêzdîbîyayişê gemarinî seba personel û xebatkaran mekanîzmayê xo awan bikerê, labelê seba ci zî ma rê dem lazim o. Nika şaredarîyan rê bi rastî personel û xebatkarê bi peyam nênê girewtiş, seba ci zî şertê KPSSyî est o. No ser zî kesêkê nê şertan nêyarê cayê xo, ma nêeşkenê înan reyde bixebitê.

Beyannameyê ma yê weçînayîşî de temsîlîyetê seyyewbînanîye est o, no ser zî xususî ma do ekîbanê xo cinî û ciwanan ra awan bikerê û wezîfe bidê. Na çarçewa de ma do kadroyanê xo goreyê beyannameyê xo awan bikerê.”

Komel xo rêxistin bikero

Dundarî ard ziwan ke warê sîyasetê DEM Partî de demokratîkbîyayîş û verba vesayetî têkoşîn est o. Ey nê ercnayîşî kerdî: “No nêzdîbîyayişê ma sey rayîrê hîrêyinî yeno namekerdiş. Nê ferasetî de hêz û qewetkerdişê STKyan est o, ma wazenê komel/civat nê warî de xo bi xo rêxistin bikero û pêvajoya demokratîke ra beşdar bibo. Demê verênî ra heta nika hem polîtîkayanê ma yê rayberîya herêmî de hem zî warê komelî de ma wazenê STK û DKOyan bidê cuyayîş û esasgirewtiş. Na zî polîtîkaya ma ya bingeyin a. Nê esasî de ma do hesasîyetanê ciwan, cinî, ekolojî, perwerde, dorme û weşîye verçiman bigêrê, goreyê ci zî polîtîkayanê xo awan bikerê.  Na çarçewa de ma heme dînamîkanê bajarî de îstîşare û komxebatî kerdî, ma do dîyarkerdişê polîtîkayanê xo de nê hesasîyetan verçiman bigerê. Ma do rayberîya herêmî ya beşdarvan, demokratîk û azadîwaze awan bikerê û goreyê ci zî esasanê xo dîyar bikerê. Na rayberîya ma de heme dormegerî do xo bivînê, xo sey dîyarker hîs bikerê. Çimkî ma rayberîya herêmî ya şarhesî wad kenê.”

Qirkerdişêko sipî

Dundarî îfade kerd ke cewherê polîtîkaya qeyumî de qirkerdişêko sipî est o û wina vat: “Çimkî nê qirkerdişî de kurdî teberê sazîyanê xo de veradîyayî û bêîrade ameyî veradayîş. Bi cidî rewşa polîtîkayêka qirkere orte de est a. Kurdî kultur, ziwan, tarîx û qiymetanê xo yê eslî ra ameyê dûrvistiş û tepaveradayîş. No rejîm, rejîmê qeyuman o û armancê înan qirkerdişê şarê kurdî yo. Nê rejîmî de armanc awankerdişê sentezî yê Tirkistanî yo û goreyê ci zî rêxistinîya xo kerde.”

Verba tiryakî têkoşîn

Dundarî da zanayene ke şuxilnayîşê tîryakî zêdîyayo û wina dewam kerd: “Ma eşkenê aşkera bivajê ke na babete de verba ma polîtîkaya dewlete ya sîstematîke est a. Seba ke ma komelî rê omid û ameyox pêşkêş bikerê, waranê cuye yanê alternatîfan awan bikerê. Ma ganî malbatanê xo hîşyar bikerê û înan rê destek bidê. Nê zî encax ma do bi rayîrê rêxistinkerdeyî û bi hişmendîya awankerde bikerê. Ma do merkezanê verba tiryakî abikerê, nê merkezan do sey merkezanê tibbî û eynî demî de zî do destekê psîkolojîkî bidê. Nê polîtîkayanê xo de ma do plananê xo yê stratejîk û wertaxî esas bigêrê. Ma do ciwanê ma ke tiryakî ra nêkewtî ra zî bi aktîvîteyanê huner, kulturî û waranê şayîye ra han bikerê.”

Şaredarîya zafziwane

Dundarî dîyar kerd de bingeyê rejîmê qeyumî de qirkerdişê vîr û asîmîlasyon est o. Ey wina vat: “Xususî bi serrano zîhnîyeto gemarin ziwan û kulturê kurdan red keno û wazeno bihelîno. Çi heyfo ke şaredarîyanê ma de zîhnîyetê qeyumî şaredarîya zafziwane hedef girewte û hêrişê nê xebatanê ma yê erjayeyan kerd. Heme berê sazîyanê ma qiymetêr girewtê û kîlît kerdê. Çimkî armancê înan kurdan bi temamî çinkerdiş bî, la na babete de projeyê ma hadre yê û ma do sazîyanê xo newe ra abikerê.”