Qezaya Esenyurtî ya Stenbolî de Hatîce Yildiza 75 serrî seba ke kênaya xo ya tepişte û embaza ci rê pere şawit ameye tepiştene. Cinîya nêweş û kokime keye ra bi sedye ameye vetene.

Hatice Yildize seba ke kênaya xo û embaza ci rê pere şawit derheqê ci de bi îdîaya ”rêxistine rê paştdayîşê fînasmanî” dewa ameye akerdene. Badê muhakemekerdişê 3 serran Mehkemeya Cezaya Girane ya 14. ya Stenbolî ceyaza 4 serran û 2 aşman daye Yildize. Qerar hetê Mehkemeya Îstînafî ra zî ame qebulkerdene.

Badê qerarî polîsan vizêr şan eşt keyeyê Hatice Yildize ser ke xeylêk nêweşîye ci est ê. Hatîce Yildiza ke rewşa ci giranêr bîye keye ra bi sedye ameye vetene. Verî bi ambulans ameye berdene nêweşxane, dima ameye berdene edlîye û ûca ra zî ameye berdene Zîndanê Qefilnayeyî yê Cinîyan ê Bakirkoyî.

Lajê Hatice Yildize, Alper Yildizî vat, ”Heta ewro goreyê qanûnê Tirkîya zîndan rê pere şawitiş sûc nîyo. No qerar çarçewaya huqûqê dişmenîye de ameyo girewtene.”