Eno sername belesebeb o. Tenî sebebêkey cê esto ke a sere ez pêhesiya wa ke çawey weçînayiş de rey yena eyştişî. Erê, seran ra serey 1987’î bî. A çaxî ez diyes serî ya. Tirkiya de weçînayişo pêroyîn est o. Dewey ma Zenge de zî sindoqî hamey rûnayişî. Dewicî şinê rey erzenê. Enka nîno vîrê mi dew de kamco partî zehf rey girotîbî, la yeno mi vîr ke kê ma û zehfê dewican rey dabî partîya ANAP’î ay Turgut Ozalî.
Yeno mi vîr, ez dadê xwu dir şiya mekteb, dadê mi pisûla girote. Ez tût a. Mi va, “Dayê, tu go mohr bide binê mêsey hengemînî ro”. Moxtarê dew ewca bî, hewa; bi hewayiş va, “Merdim eşkeno nêvano.”
Axir, dadê mi rey eyşte sindoqe û ma kewtî teber. Partîya Ozalî bîye yewîne. Dima ra kurdan zî partî viraşte, şarê ma verê xwu da a partî. Reyna yeno mi vîr, HEP, partî SHP’î dir kewt bî miyanê weçînayişî û şar çawey kewt bî miyanê heyecanêkê bînî. A çaxî ez 16 serî biya. Hema heqê mi ê reyeyştişî çini yo la heyecanê ma ciwanan zî est o. Reyna yeno mi vîr, a çaxî qehwe de mêrdan çawey bi heyecan goş ro televîzyon kerd bî bel.
DEHAP
Dima ra heyecanê DEHAP’î yeno mi vîr. Seran ra sere 2002 wa. Ez 27 serî wa û nawey heqê mi ke ez rey berzî zî est o. Şan de reyna ma verê televîzyonî de yê û ma çirkikêkê çiman nênanê pêser, ma verê televîzyonî de yê. Sindoqî bîyî ay. Semedo ke verî sindoqê hetê bajaranê ma bîyî a, rey DEHAP’î zehf eysenê. DEHAP’î sera 15 derbas kerdo. Bendav sera 10 o. Kêf miyanê ma de est o. Ma çi zanê ke hetê bajaranê ma de ma go zehf rey bigîrê, la hetê metropolan de go paştey ma bêro şikitişî? Her ke şî, hetê metropolanê Tirkiya de wexto ke sindoqî bîyî a rey DEHAP’î bî kemî. Rey hamey war, hame verî 10’î, ma hêvî kenê ewca vindero, la nê; rey hamey binê 10’î û hamey sera 6.2 de eleqiyayî. Xeyalê ma şikiyay bî. Zey sêwiyan serey ma kewt bî verê ma.
Weçînayişê bînan xwu ra şima zanê. Enka weçînayişêko bîn verê ma de wo. Eno weçînayişê bînan ra zêdeyêrî biqîmet o. Zêdeyêrî talûke û serkewtinan miyanê xwu de hebêneno.
‘Ma go qayûman bişirawê’
Weçînayişê 2019’inan de dewlete/hikumetî ceribandinêke viraşte. Gamêka newî bîye, partîyanê kurdan gole werde. Ma qalê Şirnexî kenê. Şirnex de bi vengê teber ra ardbî û Şaredarîya Şirnexî girote. La ene wey zehf cayanê bînan de gamê aneyînî eyştê. Gorey DEM Partî vat, zehf qeza û bajaran de “weçînayoxê xeyalî” berdê ê cayan. Ger hikumet zey reya bîne Şirnexî, ene gamey xwu de bi ser biko, weçînayişê seran ê vernî ma de şaredariyan bikerê xwu vîra. Loma zî eno çewînayiş muhîm o û ci rê cidiyetêko tewf pîl lazim o. Partîya kurdan gere her game zêdeyêrî cidî xebate bikero. Ger nêşko hûmarey weçînayoxanê xwu bikero di qatî, kar û emel zor o. Ger bikero di qatî, a çaxî zî rewşêka bîne yena meydan: Verê heme zor û zehmetiyan zî şar wayîr ro partî xwu vecêno. La gere kadroy partî, verendamê şaredariyan tewr zehf bixebetiyê. Bi cidiyet, isûl û qayde, zanayiş, plan û program. Nê ke tenî vacê “Ma go qayûman bişirawê”. Gere enî wetêrî çiyan vacê, di qatî zêdeyêrî gorey partiyanê bînan ra bixebetiyê. Ma bawnê hela go mesela seyîn derbas bibo. Wa heme çî bixêr bo.
