Namzedanê Şaredarîya Stenbolî yê DEM Partî Merale Daniş Beştaş û Murat Çepnîyî qezaya Tuzla de karkerê tersaneyî zîyaret kerdî.

Namzedanê Şaredarîya Stenbolî yê DEM Partî Meral Daniş Beştaşe û Murat Çepnîyî qezaya Tuzla de karkerê tersaneyî zîyaret kerdî. Hemserekê ESPyî Şahîn Tumuklu, parlamentere Çîçek Otlu û xeylêk endamê partîye zî tewrê zîyaretî bîyî.

Karkeran ra vilawekî ameyî vilakerdene. Dima girseyî karkeran reyde ver bi Tersaneyê Keştîyan ê Tuzla rayraşîyayîş kerd. Tîya de Beştaşe û Çepnî bi vilikan ameyî pêşwazîkerdene. Beştaşe û Çepnîyî karkeran reyde govende girewte û ancî vilawekî vila kerdî.

Murat Çepnîyî xîtabê karkeran kerd û ard ziwan ke karkeran rê neheqîye yena kerdene, bêtazmînatî karkerî gureyî ra yenê vetene. Çepnîyî vat: “Ma sey partîya karker û xizanan tîya de yê. Ma seba temsîlkarîya karkeran bîyî namzedê Şaredarîya Stenbolî. Şaredarîya Stenbolî wextê ma de do biba Şaredarîya Karkeran. Ma tim hetê xoverdayîşê karkeran de yê.”