DEM Partî çarçewa xebatanê weçînayîşan de di baskan ra kombîyayîşê şarî Şemzînan û Erdexan de dayî destpêkerdene. 

Qezaya Şemzînanî ya Colemêrgî de bi beşdarîya Hemserekê DEM Partî Tuncer Bakirhanî hem kombîyayîşê şarî hem zî akerdişê buroyê weçînayîşî ameyî kerdene. Şarî bi coşî heyetê DEM Partî pêşwazî kerd.

Bakirhanî Şemzînan de pare kerd ke ê do qetîyen qeyûman bişawê û vat: “Îqtîdar ancax bi hîleyan eşkeno. La rewşa ma bihêz a. Ê kesê ke kurdan nêhesibnenê û zîndanan de pûç kenê ma do 31ê adare de cinî û ciwanan reyde derse bidê înan.”

Qiseykerdişan ra dima buro ame akerdene. Bakirhan û heyet pîya derbazê qezaya Geverî bîyî.

Hemsereka DEM Partî Tulay Hatîmogullari û heyetê ci Erdexan de kombîyayîşê şarî kerd. Şarî bi konvoyan, çepik û sloganan heyet pêşwazî kerd. Namzedê Şaredarîya Erdexanî yê DEM Partî Serkan Yilmazî kombîyayîş de qisey kerd û ard ziwan ke DEM Partî do welat de têdûştîye, aştîye û edaletî bîyara ca.

Tulay Hatîmogullari bale ante xoverdayoxîya şarê qeza ser û îfade kerd ke seba Erdexanî projeyê înan zaf ê û ê do namzedanê xo reyde nê projeyan bîyarê ca. Hemsereke vist vîrî ke Licikê Erzînganî de new kedkarê madenî hema zî binê erdî de yê û Erdexan de zî projeyêko winayên est o. Hemsereke vat: “Ma do rayîr nêdê nê madenî.”