Hemsereka MED TUHAD-FEDî Emîne Kaya îfade kerd ke ganî her kes wayîrê nê têkoşînê tarîxî û rayraşîyayîşê azadîye bivejîyo.

Kaya tecrîd sey sûcê merdimîye name kerd û nê vatî: “Polîtîkaya tecrîdî tesîrê heme kurdan û şaranê Rojhelatê Mîyanênî kena. Îqtîdar Kurdistan de şer rayra beno. Rayraşîyayîşê ma bi hewayêkê qerardarî dewam keno. Rixmo ke astengkerdişî est ê zî ma do tarîxo ke bewlî kerdo o wext rayraşîyayîşê xo biqedinê. Heta şiknayîşê tecrîdê serê Abdullah Ocalanî do çalakîyê ma dewam bikerê. Bi nê rayraşîyayîşî azadîya fîzîkî ya Abdullah Ocalanî wazenê. Têkoşîno xurt yeno dayene. Ma do pîya bi şarî têkoşînê xo ser bifînê. Ewro îqtîdar bi polîtîkaya tecrîdî sîyaset keno. Ma seba ke verê nê sîyasetî bîgêrê, ewro rayra şinê. Şar zaf paştî dano nê rayraşîyayîşî. Êyê ke wazenê verê rayraşîyayîşê ma bigêrê wa hol bizanê ke ma qerardar ê, ma do pîya bi şarê xo na dewaya heqdare çirey cameverdê. Ganî her hes wayîrê nê têkoşînê tarîxî bivejîyo.”

Wext wextê têkoşînî yo

Kaya wina dewam kerd: “Xoverdayoxê zîndanan grevê vêşanîye de yê û Dayîkê Haştîye Nobeta Edaletî raya benê. Na têna meseleya înan nîya, meseleya ma perûn a. Ganî her kes mîyanê nê têkoşînî de ca bîgêro. Têna bi xurtkerdişê têkoşînî ma eşkenê tecrîdî bişiknê. Bitaybetî ganî cinîyî serkêşîya nê têkoşînî bikerê. Çike bedelê tewr pîlî yê şerî ma cinîyî danê. Nê prosesê tarîxî de berpirsîyarîya ma pîl a. Heme şarê Rojhelatê Mîyanênî ganî paştî bidê nê rayraşîyayîşî. Bêrê ma pêro pîya verê nê zilmî bigêrê, pîya cuyeya bianor înşa bikerê. Ganî hinî her kes destê xo bikerê binê kerra. Wext wextê têkoşînî yo, wextê yewîye yo.”