Aktîvîsta TJA Hacer Ozdemîre konferansê ‘Zîncîrê Bêvengîye’ de wina qisey kerd: “Îşkence û tepiştişî çend bizêdîyê, xoverdayîşê ma zî hende hîra beno. Bi felsefeya ‘Jin, Jiyan, Azadî’ ma xoverdayîşê xo vila kenê.

Salona konferansî de pankarta ‘Bi Jin, Jiyan, Azadîye; Ver bi Azadîye’ ameye daliqnayene.

Hemsereka DBPyî Çîgdem Kiliçgun Uçare, Hemsereka SYKPyî Canan Yuce zî tede xeylêk temsîlkarê partî û rêxistinan ê cinîyan, Mayê Aştîye, çalakîkerê Nobeta Edaletî û cinîyî zî tewrê konferansî bîyî.

Konferans de hêverî aktîvîsta TJA Kader Uzune qisey kerd û pare kerd ke ê do sey cinîyan tim xoverdayîşê xo rê dewam bikerê.

Dima aktîvîsta TJA Hacer Ozdemîre xîtabê girseyî kerd. Hacere qiseykerdişê xo de cinîyê tepişteyî selam kerdî û vat: “Cinîyê kurdî bi serran o zîndanan de xo ver danê. Sakîne Cansiz û embazê ci asta têkoşînê xo reyde bîyî sembolê cinîyan ê kurdan û dinya. Embazê ma tim raştê îşkence, tacîz, tecawuz û şîdetî yenê. Bi taybetî serranê peyênan de kerdişê xirabî vera embazanê ma zêdîyayî. Çar parçeyanê Kurdistanî de cinîyî zîndanan de yê. La îşkence û tepiştişî çend bizêdîyê xoverdayîşê ma zî hende hîra beno. Bi felsefeya ‘Jin, Jiyan, Azadî’ ma xoverdayîşê xo vila kenê.

Ewro zîndanan de vera tecrîdê serê Birêz Ocalanî tepişteyê sîyasîyî grevê vêşanîye de yê. Ma wazenê bi nê konferansî bibê vengê tepişteyan. Ma xoverdayîşê înan tîya ra selam kenê. Ma hêvî kenê ke konferansê ma do netîceyanê girîngan bidê. Ma embazanê xo yê tepişteyan ê sey Fîgene, Sabahate û Leyla selam kenê û înan rê serkewtiş wazenê.”